Victima di avalancha na ciudad di Mocoa, capital di departamento di Putumayo, sur di Colombia, a aumenta te 234 hende fayeci y 220 persona cu a keda herida, Cruz Cora a informa diadomingo den su ultimo informe. E ciudad aki ta declara  den estado di calamidad, pa asina permiti tur operacion di rescate y ayudo pa e victimanan, caminda hopi hende ta plama y damnifica. E tragedia a sucede diasabra marduga, ora cu tres riu cu ta core na Mocoa a sali for di nan cauce, pa motibo di  awacero cu a cai durante hopi ora. Mocoa tin cerca di 45 mil habitante.

Te na e momento aki autoridad no a descarta cu e cantidad di victima por aumenta, pasobra tin hopi hende cu a desaparece”, Juan Manuel Santos, presidente di Colombia a splica. Santos a bishita e zona di desaster, unda tin gran cantidad di lodo cu a laba bin for di e riunan, te den centro di e ciudad aki.

“Estado colombiano  a activa henter su capacidad, pa asina apoya e trabao humanitario, di buskeda y di rescate”, Santos a skirbi riba su Twitter.  E tragedia aki a sucede pa motibo cu e riunan Mocoa,  Sangoyaco y Mulato a sali for di nan cauce. “Den un nochi,  Colombia a haya mas di 3 biaha e cantidad di awa cu por cay normalmente; awacero a acumula 130 milimeter di awa den un nochi solamente, mientras cu normalmente ta acumula cerca di 400 milimeter di awa den un luna.  30% di e awa di henter luna a acumula na un nochi solamente”, Santos a splica.

E tragedia aki ta mas grandi cu e tragedia cu Colombia a  supera mas di un aña pasa , tempo cu a sucede un desaster natural na Colombia dia 18 di mei di aña 2015 na localidad di Salgar, departamento di Antioquia, y cu a laga cerca di 104 morto.

“Ta un tragedia cu ta causa nos hopi duele, y nos ta pidi SOS”, Jose Antonio Sanchez, alcalde di Mocoa a splica. E alcalde a confirma cu tin 17 bario afecta  y mas di 50% di henter poblacion ta damnifica. Na e zona no tin luz ni awa. “Nos ta isola, mi cas ta kibra completamente, e lodo a yega te parti ariba di mi cas”.

Desde diasabra tempran mainta cerca di 1.120 efectivo di ehercito y polis ta traha den tarea di rescate di herido y hende cu a fayece. Mas di cien soldad di Batayon di ingeniero militar experto den atencion di emergencia y desaster, ta activa y reparti na e zona ey pa asina duna atencion lihe.

E operativo ey ta conta cu personal di Cruz Cora, unidad di gestion di riesgo, bombero y otro organismonan. Tin operativo cuatro helicopter di ehercito y tres helicopter di polis, hunto cu cinco avion di forsa aereo Colombiano. Na puesto di mando unifica a reuni ministronan di salud, defensa y ambiente di Colombia.

E tragedia aki ta hopi complica, pasobra e zona ta isola di Colombia, ta situa den region di Amazonas, frontera cu Ecuador. E lugar aki no tin hopi caminda di acceso, anto pa grupo di rescate por yega na Mocoa ta solamente posible via aereo of via di caminda hopi deteriora. Caminda cu ta conecta cu Mocoa, ta e caretera cu  ta pasa via ciudad di Neiva y Pasto.

Santos a informa riba su cuenta di Twitter cu desde diadomingo nan lo habri un caretera cu ta comunica Mocoa cu otro sectornan di departamento di Putumayo. Hende cu a keda afecta lo haya un ayudo di 250.000 pesos (80 dollar) durante 3 luna, pa asina purba huur un cas, mientras cu gobierno ta traha riba un censo di edificio cu a keda deteriora.

Habitantenan di Mocoa ta biba rondona di naturalesa, selva y riu pero fin di siman aki a keda sorprendi pa un awacero cu a  saca e riunan for di nan cauce, y e awa a bay cu tur cos cu el a haya den su caminda.