Expertonan di MPR a presenta resultado di nan investigacion ariba situacion di coriente

Ayera mainta durante un conferencia di prensa, director di Utilities Aruba NV, Anthony Rojer; director di Elmar NV, Anthony Irausquin hunto cu expertonan Mericano di compania MPR a presenta e resultado di e investigacion cu e expertonan a conduci riba e situacion di interupcionnan di coriente na ELMAR NV.

Sr. Brian Curran di MPR a indica cu expertonan a reuni cu varios representante di ELMAR pa siña mas tocante di e interupcionnan di coriente cu a pasa, kico ELMAR ta haci tocante esaki y pa brinda nan experticio y experiencia, pa asina tin un bon caminda pa sigui pa dilanti y pa e red di coriente por bira confiabel pa tur e partinan interesa na e isla.

Durante e conferencia, MPR a elabora ariba proposito di nan investigacion, nan observacion-, conclusionnan di e investigacion den dos area grandi y presenta nan recomendacionnan.

Experto di MPR, Katherine Inge, a splica cu MPR tabatin dos proposito principal pa nan investigacion. E prome tabata pa investiga e interupcionnan di coriente di ELMAR den 2024, specificamente pa mira e causanan di e interupcionnan aki y pa mira si tabatin algun tendencia straño den e datonan aki.

E dos proposito di e investigacion tabata pa mira e plan di mantenemento di tres aña di ELMAR. Esaki ta un strategia di mantenemento cu ELMAR a implementa pa mehora confiabilidad na e isla. Nan lo toca ariba algun di desafionan pa por completa e plan aki como tambe e oficina di maneho di proyecto como un paso clave pa implementa e strategia di mantenemento aki.

Durante nan investigacion, Inge a indica, nan a reuni cu stakeholder, a revisa datonan di e interupcionnan di coriente y a mira e ekiponan di e compania.

Segun e datonan presenta pa MPR pa loke ta e interupcionnan di coriente te cu aworaki den 2024 tabatin alrededor di nuebe interupcion/blackout pa luna. Esaki, segun e expertonan, ta mas o menos mescos den comparacion cu añanan anterior.

Inge a resalta tambe cu e division di e datonan cu ta indica e causanan relaciona cu factornan externo y confiabilidad di ekipo tabata mas o menos igual den 2024. El a indica cu den añanan anterior e problemanan di confiabilidad di ekipo tabatin un porcion mas grandi di total di interupcionnan di coriente.

El a menciona cu ora nan tabata busca pa tendencianan straño nan a encontra cu tin un tendencia straño aworaki cual relaciona cu interupcionnan causa pa blaasnan di helium y fli. Datonan ta mustra cu den 2024 tabatin un aumento den e promedio di interupcion causa pa blaas di helium of fli pa luna, cu un aumento den e ultimo dos luna pasa, contrario na añanan anterior, unda e causa ey tabata menos frecuente.

Refiriendo na datonan di interupcion di coriente di aña 2020 te 2023, Inge a splica cu den termino di confiabilidad di ekipo e interupcionnan/blackouts relaciona na esaki tin e impacto mas grandi impacto pa frecuencia y duracion, locual ta nifica cu interupcionnan causa pa problemanan di confiabilidad di ekipo ta impacta clientenan mas frecuentemente y pa e tempo mas largo.

Manera ya caba menciona, ELMAR a implementa un plan di mantenemento pa drecha algun di e areanan cu MPR a señala den e resultado di nan investigacion. E strategia di mantenemento aki ta proyecta pa pasa riba e proximo tres aña y e meta ta pa reduci e cantidad di fayo di ekipo cu ta causa interupcionnan den e sistema.

Experto Spender Paul a splica cu e datonan ta mustra cu e fayo di ekipo ta e riesgo mas grandi riesgo cu nan ta mira na e isla pa e interupcionnan y e suministro confiabel di electricidad pa e ciudadanonan.

E plan di mantenemento ta enfoca riba e ekipo cu a wordo selecciona pa motibo cu ta e ekipo cu ta mas facil pa mantene aki na e isla. Paul a sigui splica cu esaki kiermen cu den termino di accesibilidad pa inspeccion, pa test y finalmente pa reemplasa, esaki ta loke nan ta considera e “frutanan cu ta mas facil pa alcansa” cual ta e cosnan cu por wordo drecha prome.

El a resalta cu e meta ta pa haya un balans entre sentido practico di mantenemento, e impacto cu lo tin riba interupcionnan di coriente y tambe e costo di haci e mantenemento pa asina por keda sensitivo pa e costo di electricidad na e isla.

Paul a remarca cu algo cu a keda omiti for di e plan di mantenemento ta e kabelnan bao di tera. El a indica cu tin un porcion di interupcionnan causa pa kabelnan bao di tera y esey ta relaciona cu loke el a menciona anteriormente tocante di e mezcla di factornan y cu nan kier keda sensitivo pa e costo di electricidad, pasobra mantencion e ekipo aki ta na un costo substancialmente mas halto cu loke ta tin den bista aworaki.

Referiendo na e estado di esfuerso di mantenemento manera e ta aworaki, el a indica cu tin progreso inicial pa logra e meta, pero definitivamente e comienso ta cana poco poco. El a menciona cu esaki ta debi na falta di materialnan y ekipo cu ta necesario pa e mantenemento. Nan ta proyecta cu debi na e inventario abao di e ekipo, e progreso probablemente lo stop mientras cu ta warda pa e ekipo nobo yega.

Pa loke ta e desafionan mas grandi cu nan ta mira pa e completacion di e iniciativa di mantenemento di ELMAR, Paul a resalta cu e prome desafio ta cu esaki ta un emprendimento grandi pa ELMAR y ta un aumento grandi den e trabao cu e personal di ELMAR ta tuma internamente.

El a indica cu loke nan ta spera cu lo sucede ta a cu lo tin algun desafio cu personal pa e trabao aki, como tambe desafionan cu prioridadnan den competencia cu hendenan importante den ELMAR mientras nan ta maneha operacionnan diario, mientras tambe ta ataca e mantenemento.

Otro problema cu a bin dilanti ta cu lo tin un cantidad substancial di ekipo di reemplaso y material cu ta necesario pa logra e mantenemento. El a agrega cu globalmente esaki ta un problema ya cu e cadena di suministro di ekipo y material ta lucha cu e demanda pa ekipo electrico.

Por ultimo, Paul a indica cu loke nan ta mira ta cu e iniciativa di mantenemento aki tin un cambio significativo den manera cu ELMAR tabata conduci negoshi anteriormente y esaki lo trece algun desafio organisacional den ELMAR.

E experto a señala cu nan por spera, specialmente cu e velocidad na unda nan ta ataca e mantenemento, cu lo tin desafionan cu comunicacion, coordinacion y planificacion den e diferente departamento cu ta necesario pa logra esaki cu exito.

El a agrega cu nan spera cu e cambio aki tambe ta bay trece un cambio den e rol y responsabilidad di e individuonan den ELMAR. Paul a remarca cu e metanan di rindimento y expectativa lo mester wordo alinea, no solamente pa e iniciativa mes, pero pa e individuonan den ELMAR cu ta responsable pa e trabou y kico e exito ta pa nan.

Por lesa mas detaye di e resultado di e investigacion y recomendacionnan di e expertonan di MPR den nos edicion di mañan.