ATIA no ta contra di un ampliacion di e canasta basico basta cu e ta wordo haci di un manera consciente. Tampoco nan no ta contra di reduccion riba tarifa of prijs di servicionan publico manera awa y coriente, pero basta cu e ta wordo haci di un forma responsabel.

Presidente di ATIA, Ronald van Trigt ta haya cu naturalmente gobierno tin semper un tarea pa purba di controla e cosnan cu nan por controla. Sinembargo asunto di awa y coriente ta un topico complica. Den pasado caba gobierno a intermedia pa purba di bin cu un regulacion y evita cu prijsnan dos servicionan publico aki ta fluctua menos

Sinembargo nos tin cu compronde cu nos ta produciendo awa y coriente unda fuel tin su efecto riba e prijs of tarifa local di awa y coriente. Presidente di ATIA ta considera cu regula esaki por tin su efecto negativo tambe. El a trece como ehempel e caso di Corsou, unda nan a purba di subsidia e servicionan aki, y nan a crea un debe di miyones den nan empresanan cu ta produci e servicionan publico aki. E gremio aki ta kere cu mester tene stabiel e companianan WEB como Elmar di vital importancia pa nos pais.

Di otro banda ATIA ta referi riba e anuncio di gobierno pa aumenta e canasta basico. E gremio aki cu ta agrupa e comerciantenan y inversionistanan local ta haya cu esaki ta algo positivo. Logicamente mester yega na cierto productonan cu pa ehempel por elimina impuesto di importacion riba nan pa asina suavisa e prijs cu nan tin pa e consumidor.

ATIA ta haya cu e control di prijs riba e productonan di mas esencial cu un pais ta consumi ta importante. Nan a scucha gobierno papia di esaki y tambe ATIA ta kere cu nan ta implementando esaki. Nan por mira cu instancia di gobierno ta bay controla den cierto supermercadonan, y nan ta kere cu esey ta e meta di purba regula e prijsnan di productonan basico.

Un punto cu sr. van Trigt a trece dilanti ta cu regula prijs tambe ta algo cu ta afecta comercio. “Nos tin un mercado liber y mas regulacion bo tin, menos espacio bo tin pa haci negoshi tambe.” ATIA ta kere tambe cu e productonan di mas basico mester tin cierto regulacion. Pero el a trece acerca tambe cu e regulacion mester bay riba e productonan cu nan tin control riba dje.

“Bo no por regula algo cu bo no tin control riba dje.” El a trece e ehempel na Venezuela, unda e gobierno a bin cu un cantidad di regulacion riba cosnan cu no tin control riba dje, locual ta ocasiona un collapse den bo economia.

E ta haya cu nos no tin control riba prijs di azeta y hariña riba mercado internacional, y tampoco riba cierto otro productonan, y mester tene cuenta cu e aspecto aki. Sinembargo e ta haya cu si nos tin control riba nos sueldonan. “Cuanto nos tin cu paga y unda e pago ta exactamente pa nos por sigui produci di un manera eficiente y productivo.”

ATIA a expresa su boluntad di unda cu nan pa atende cu e asuntonan aki, pero den consulta cu comercio pa evalua si por tin espacio pa regula cierto productonan.

Gobierno y canasta basico
Prome minister, Evely Wever-Croes a elabora riba asunto di ampliacion di canasta basico y control di prijs, unda e mandatario a laga sa cu tin un mercado liber cu nan ta respeta.

Sinembargo pa gobierno actual e control di prijs ta hopi importante. Igualmente minister di financia, Xiomara Ruiz-Maduro a yega di informa cu e control a cuminsa rond di Aruba pa evita abuso den prijs. Esaki specialmente riba productonan cu nan prijs ta wordo regula pa gobierno. E prome resultadonan di e accionnan di control di prijs aki a drenta y awor nan ta cuminsa traha riba analisis.

E prome mandatario a indica cu ora ta trata di productonan basico ‘tur pais cu tin su pueblo na pecho’ ta bin cu un serie di control di prijs, y nan a bin cu esaki tambe. E ta haya cu nos canasta basico ta uno limita y chikito, compara cu Corsou cu tin mas cu shen producto, mientras cu Aruba no ta surpasa ni 20 producto.

Gobierno kier amplia esaki, ya cu e productonan cu ta cay den e lista di control e instancia di gobierno tin autoridad pa controla nan prijs. Si nan no ta cay den e canasta basico e control aki no ta sosode. E ta considera importante controla e prijsnan pa evita abuso of speculacion riba e prijsnan.

Gobierno ta haya cu esaki ta un sistema of instrumento cu e ciudadano ta bay sinti cu tin miho control y cu no tin abuso riba prijsnan. E prome mandatario a recorda tur hende, specialmente e sector comercial, pa keda na e reglanan estableci pa no specula riba prijs di productonan basico. Specialmente den e temporada economico dificil aki. Nan kier mantene e prijs di e canasta basico abou pa evita un aumento riba costo di bida.

El a bisa cu e aspecto aki di ampliacion y control di e canasta basico ta un punto importante di nan plan di gobernacion. E mandatario a expresa su satisfaccion cu nan a cuminsa cu e esaki caba den e prome 100 dia di gobernacion, unda nan a confronta ‘yen di problema desagradabel’.