Tin un aumento den cantidad di infeccion di Covid-19 den islanan Aruba, Corsou, St. Maarten y Bonaire. Den siman di 15 te 21 di juli ultimo, 646 persona den islanan di Caribe a ricibi un resultado positivo pa e test di SARS-CoV-2, e virus cu ta causa e malesa di Covid-19, y e mayoria di esakinan tabata na Aruba y Corsou.
Sinembargo, segun website di RIVM, e cantidad di hospitalisacion riba e islanan ainda ta abao. Esaki segun un relato di portal noticiero Curaçao Chronicle.
Na Aruba, 58 persona per 100mil habitante a ricibi un test positivo pa SARS-CoV-2 siman pasa, un aumento compara cu un siman anterior, unda tabatin 33 test positivo pa cada 100mil habitante). Actualmente tin 4 hospitalisacion, 2 di cual ta den unidad di cuido intensivo ICU. Den siman 27, kimsurveillance un biaha mas ta mustra casonan di variante delta riba nos isla (40%). Varios caso di e variante delta a keda detecta tambe den e kiemsurveillance local, indicando un aumento den e transmision local di e variante aki (32% den siman 26).
E cantidad di infeccion di coronavirus, segun Curaçao Chronicle, tambe ta aumentando. Siman pasa, 108 persona per 100mil habitante a ricibi un resultado di test positivo pa SARS-CoV-2, un duplicacion compara cu un siman anterior (56 per 100mil riba dia 12 di juli). E porcentahe di persona cu a test positivo tabata 11 porciento siman pasa. E isla ta señala un aumento den e cantidad di caso importa for di Hulanda. Ademas, un cantidad di clusternan nobo a keda reporta, incluyendo den scolnan y na pia di trabao. Te cu recientemente, e variante alfa tabata dominante riba e isla (100 porciento riba siman 26).
Di e kiemsurveillance local, basa riba tecnologia PCR, e variante delta a keda detecta riba e isla (88.2 porciento di 17 muestra riba siman 28).
Na Corsou, 310 persona per 100mil habitante a ricibi un test positivo SARS-CoV-2, un cantidad alarmante compara cu un siman anterior (105 pero 100mil riba dia 15 di juli).
E aumento den e cantidad di infeccion nobo den dianan recien por ta relaciona na varios cluster, incluyendo bida nocturno, club di beach, un cas di studiante y e base di marinier. Den ultimo dos siman, casi 50 porciento di infeccion tabata den grupo di edad 19-24 aña. Esaki ta un cambio for di brotenan anterior; mas hende hoben awo ta contagiando. Mayoria di nan no ta completamente vacuna. Ademas, e variante delta a keda detecta na e isla den siman 26. E isla aki tambe ta mira un aumento den e cantidad di caso importa, specialmente entre biaheronan for di Hulanda y Cuba. Actualmente tin 4 hospitalisa riba piso di Covid.
Riba St. Maarten, 63 persona per 100mil habitante a ricibi un resultado positivo pa test SARS-CoV-2 siman pasa, un aumento compara na un siman anterior (42 per 100mil riba dia 15 di juli). Tin actualmente dos persona admiti den hospital, tur riba piso di Covid. Surveillance ta mustra un circulacion menor di e variante alfa riba e isla (28.6 porciento riba siman 27). E variante delta tambe ta parce di ta plamando localmente (71.4 porciento riba siman 27). E incidencia den e banda Frances di e isla ta keda relativamente halto (144 per 100mil habitante riba siman 27) y un cluster nobo a keda registra riba banda Frances.
No a reporta infeccionnan di SARS-CoV-2 riba Saba desde dia 11 di meil ultimo. Desde 21 di januari ultimo, no a reporta ningun resultado positivo di SARS-CoV-2 riba St. Eustatius.
