“Ora cu nos mira bek den e tempo cu ATV a cuminsa cu su produccion y transmision exactamente 20 aña pasa, tabata a base di un vision pa diversifica e balor recreativo di television; un television den cual cada televidente por a reconoce su mes pa e por a disfruta di un variacion nunca bisto na Aruba”, asina Tom Pietersz, director di e planta di television a cuminsa cu su editorial diahuebs ultimo na ocasion di transmision di e ultimo edicion di “Noticia Awenochi” for di e studionan den Royal Plaza Mall.
Por corda un cantidad di serie di documentario, simannan di buki, simannan di Anne Frank, siman di peliculanan clasico, e perfil di nos baluartenan y asina por sigui menciona e serie cu a deleita nos hendenan cu a percura pa e dedicacion ey. Shownan manera ‘Mecca’, ‘Meccalicious’ y ‘Suave’ tabata e furor di e decada ya cu hubentud tabata parti di e organisacion y produccion di e shownan aki.
Den deporte ATV a organisa su propio programanan di boxeo cu tribunanan yen na Havana y despues na Renaissance; cu celebridadnan invita manera Sugar Ray Leonard y nos propio y mas famoso, e legendario Sugar Boy Nando. E cobertura di futbol di Copanan Mundial, Copa America, Copa Europa, entre otro, a bira cada biaha fiestanan nacional pa simannan largo danki na hopi empuhe di e socionan comercial prominente di e canal di television.
E anual y tradicional transmisionnan en bibo di competencianan sea di futbol local, tennis, basketball, paso fino y te hasta landamento, cu ningun hende a logra di haci na nivel internacional manera ATV si a haci.
E noticianan manera ‘Noticia Awe Nochi’ indudablemente a habri wowo di nos comunidad di con un noticiero por ta recreativo y dibertido; hasta ora tin noticianan duro. E personahenan a bira celebridad dor cu e televidente a acepta y carga nan como tal. E noticieronan na Hulandes, Ingles y mas final, na Spaño, tur tabatin un accento otro y un format diferente; practicamente competiendo cu otro.
E transmisionnan bibo cu e truck live for di tur skina di Aruba di e ultimo acontecimentonan tabata e impacto di mas grandi riba nos isla pa añanan largo. ATV semper tabata pendiente di e pueblo, scucha nan opinion, biba cu nan preocupacionnan y celebra nan logronan.
“Den nos 20 aña di existencia, un persona cu sin duda a duna nos su cooperacion, su comprension y sosten sin reserva tabata Shea Lichtenstein, propietario di Royal Plaza, sede di ATV desde su inicio. Nos a haci hopi cos grandi y nunca bisto for di Royal Plaza, danki na su persona. Awe nos kier yama danki pa su aceptacion sincero di nos como persona y compania”, asina Tom Pietersz a enfatisa durante su discurso den e editorial.
“Cu e situacion a cambia den e ultimo aña y cu awe ta nos ultimo dia di transmision den Royal Plaza no a cambia e reconocemento y afecto cu nos tin pa su persona. Tempo a cambia y ATV a realisa cu e mester re inventa su mes; e mester modernisa y rehubenece creando atrobe e tipo di movemento y efecto ‘wow’ cu a tene hopi hende lanta, pendiente y ansioso pa loke e ta produci y transmiti; loke el a haci 20 aña pasa. Awo lo bay haci esaki for di un propio localidad nobo y central. Nos ta bandona nos cas di tanto recuerdo y logro”.
ATV ta priminti cu den nan localidad nobo den edificio di Nikky Habibe den caya grandi, lo cuminsa un epoca nobo cu ideanan grandi y innovativo.
“Como boso sirbido di Mesa Rondo tur e 20 aña, mi a duna sentido di mision special cu nos televidentenan merece y mi a haci cu hopi dedicacion y amor. Danki pa tur e atencion cu nos ta hayando den e ultimo simannan”, asina Tom Pietersz a termina bisando.
ATV a cuminsa cu su transmisionnan oficial dia 30 di september 1996 y desde e tempo ey a sa di haci un cambio grandi den television riba nos isla. Na varios ocasion, pa hopi aña consecutivo ATV a gana premio como television di aña y specialmente presentando e noticia cu mas sintonia nacional. ATV ta conoci pa su caranan cu diariamente ta presenta e noticianan mas importante di dia. Caranan di experiencia y cu na un forma profesional ta tene televidentenan bon informa.
