AT&T ta bisa cu lo stop di promociona su rednan wireless como ‘5G Evolution’ despues cu un division di e Better Business Bureau a determina cu su lenguahe tabata engañoso. E red AT&T a nombra asina no ta, de hecho, 5G – un tecnologia nobo pa data wireless rapido.
Mientras AT&T y otro carrier na Merca awo a cuminsa lansa rednan berdaderamente 5G, AT&T na december 2018 a cuminsa papia di un servicio ‘5G Evolution’ cu ya tabata disponibel den centenares di mercado, y a pone un icono ‘5G E’ riba celularnan ora nan tabata conecta cu e red. Pero e no tabata 5G. e tabata simplemente e red 4G existente cu boost di velocidad menor, sikiera compara cu e tipo di red 5G mas lihe.
Awo, un division di Better Business Bureau cu ta regula industria di aviso a recomenda cu AT&T stop di usa ‘5G evolution’ y ‘5G Evolution, The First Step to 5G’ den su mercadeo. Su rival T-Mobile a entrega un keho tocante lenguahe di AT&T.
E panel a haya cu e lenguahe aki ‘lo confundi consumidonan racional den pensa cu AT&T ta ofreciendo un red 5G’.
AT&T a bisa cu no ta di acuerdo cu e rasonamento di e grupo pero lo cumpli cu e decision. No ta cla kico esey ta nifica ni con hopi AT&T ta usa e marca ‘5G Evolution’ awendia den su tienda y avisonan.
Actualmente AT&T a crea un berdadero red 5G, y ta bisa cu cobertura nacional lo ta disponibel berano proximo. Pero lo dura un tempo prome cu mayoria di consumidor ripara, ya cu te awo apenas algun celular ta habilita pa 5G.
