Varios biaha nos a trece e asunto di e ley riba financiamento di partido politico bao di atencion publico. Recientemente a bin un contesta ‘medio medio’ di parti di gobierno, cu nan a pone e proyecto di ley den man di un di e ‘backbenchernan’ den parlamento… pa e haci kico cu ne?

Kico un parlamentario, cu no ta ni hurista, mester mehora den e asunto aki? OK, nos a comprende atrobe: nan ta ‘bezig’ cu ne, loke ta implica:”silencio, nan ta trahando duro; ora e ta cla, boso ta haya sa.” Laga nos pensa un rato: nan lo ta cla banda di october e aña aki? En todo caso bon na tempo pa eleccion di 2021…

Si bo kier ta serio den e asunto aki, bisa anto cu e miho huristanan den servicio di gobierno ta trahando duro riba e ultimo detayenan. Y pakico nos ta bisa ‘e ultimo detayenan’? Pasobra tur e otro paisnan den Reino tin un ley asina caba, y pa motibo cu semper mester trata na mantene concordancia entre legislacion di e diferente islanan, ta solamente algun detaye lo por cambia, cu talbes ta pas miho cu nos sistema. Ademas mester tene cuenta cu legislacion Hulandes, cu cual tambe mester mantene concordancia, aunke cu e diferencianan entre un pais grandi y un comunidad chikito manera esun di nos por haci cierto diferencia necesario.

Pero manera a sucede cu tantisimo ley caba cu nos tin, nan ta nada mas cu un copia cu entre 95 pa 99% e contenido di esun di Curaçao, of di Antias den pasado. Asina ta cu nos no ta mira kico tanto mester studia riba e proyecto aki. Si acaso tin algo cu mester mehora riba esun di Curaçao, anto nos tin sugerencia tambe. E ley di nos hermana isla ta permiti aceptacion liber di placa cash te un suma di cinco mil florin, sin registracion di e donante. Nos ta kere cu esey ta demasiado generoso, cu ta bay hiba na mantene sumanan considerabel for di e administracion oficial di e partido. Tambe un ley cu ta regarda solamente e partido no ta bay ta suficiente, ya cu (casi) tur partido politico a huy bay warda placa den fundacion cu nan a lanta pa e proposito aki. Esey ta implica cu un ley cu ta concerni e partido so, no ta ni merece e esfuerso pa trece den parlamento.

Pa duna un ehemplo con importante esaki por ta: den e invasion di siman pasa, Ministerio Publico a bay pa e administracion di un fundacion tambe. Nan no a haci esey por nada, lo tin e sospecho cu tin recurso financiero envolvi cu e caso den e entidad legal aki.

Pero tin mas argumento pa gobierno haci lihe cu e ley di financiamento di partido politico. Esey ta na prome luga nan propio cara como partido. Pa prome biaha den historia di Reino autoridadnan hudicial a invadi vivienda y oficina di un mandatario y mas di dies otro adres. Hulanda lo ta pone tanto recurso disponibel si ta trata un caso di ‘djis un par di permiso’? Ta bay keda keto un rato, warda con cos ta bay y despues pasa pa orden di dia? Ta bay ignora tur e señalnan cu tabatin den e ultimo añanan cu ta concerni diferente ministerio, y ta pretende cu nada no a pasa? Cu esaki tabata un incidente, por lo demas tur cos ta perfecto?

Sin cu mester ‘jump to conclusions’ tocante e culpabilidad di e ministro en particular aki, ya ta asina cu algo mester a pasa cu no ta bon pa e asunto yega asina leu. Es decir, e situacion aki ta mustra un biaha mas cu ta urgente pa pone atencion na e reglanan necesario pa mantene integridad den gobernacion, y no simplemente pensa cu corupcion ta algo cu ‘e otronan tabata haci, anos no!’ Y tur hende sa cu un di e peligronan mayor ta e tumamento di placa pa campaña, pa despues ora ta den gobernacion haci ‘payback time’ pa e contribuyente grandi. E otro fuente di placa pa campaña ta bin di e ‘chicamento’ di e procesonan di permiso cu gobernacion conoce. Y talbes den esaki nos mester bay mas leu ainda cu e control financiero riba e partido, cu ta keda cu su retonan. Por opta tambe pa e modelo Hulandes unda no por tuma placa mes, pero lo tin subsidio pa e partidonan politico.

Si e partido den gobierno ta desea di gana algo di nan prestigio bek cu nan a perde den siman pasa, anto nan mester mustra cu nan ta dispuesto di tuma iniciativa pa mehora cos. Realmente, den e contexto aki e caso di e ministro marca como sospechoso no ta mas cu un momento di reflexion con pa sigui, cu gobernacion drechi. E pregunta ta si e partido den gobierno ta desea di haci algo, o ta dispuesto pa carga e sospecho cu nan no kier mehora nada den e sistema dañino aki. Y talbes ta habri porta pa oposicion considera bin cu un ley di iniciativa. E escogencia ta na nan.