Atrobe promesa di apertura di refineria?

Despues cu algun tempo pasa a haya e noticia di Citgo (cual di nan?) cu ta pone e proyecto di rehabilitacion den un slowdown mode, no pasobra nan ta desea esey, sino pasobra no tin manera pa sigui na e momento aki, awor ta anuncia yegada di otro delegacion cu ta bin papia cu gobierno. Mas detaye no ta conoci pero e noticia tabata suficiente pa lanta henter e discusion atrobe tocante kico pa haci. Biaha pasa e delegacion a trece dilanti cu e sancionnan di gobierno Mericano lo ta culpa pa no por trece inversion Aruba. Esey por ta berdad, pero manera nos a yega di comenta anteriormente caba, e problemanan pa haya financiamento tabata existi desde dia cu a firma e acuerdo na palacio Miraflores na juni 2016. Y den e casi dos aña cu a transcuri despues nunca tabatin realmente un momento cu e proceso tabata cana manera mester ta.

Y e situacion na Venezuela, y specificamente di PDVSA mes, a keda deteriora te tal grado cu no tin recurso financiero, ni por fia mas pa mantene e instalacionnan na e pais mes, cu consecuencia cu produccion di petroleo di Venezuela a cay na menos di mita di loke e tabata mas di 30 aña pasa. Conocedonan di e materia na nivel internacional ta anticipa un collapse total di e empresa cu ta responsabel pa mantene henter un pueblo di 30 miyon hende na bida, cu  mas y mas importacion necesario pasobra e aparato productivo di e pais tambe a cay den otro. E consecuencianan lo ta algo cu den e era moderno no a yega di mira na ningun pais ainda. Y dia cos cuminsa drecha, e pregunta ta si un refineria bieu na Aruba lo ta nan prioridad…

Pero laga nos contempla e situacion aki na Aruba mes, cu e discusion entre esunnan cu cueste lo que cueste kier mira e refineria den operacion, y esunnan, cu a cuminsa bira hopi mas, cu ta birando consciente di e hecho cu e industria aki, na Aruba en todo caso, no tin futuro mas. Un di e aspectonan cu tin nos preocupa, ta e comentarionan tocante e posibilidad pa disolve e contract. Den e caso di un convenio un di e partidonan no por unilateralmente deshaci di e contract, asina ta cu esey solamente lo ta posibel si Aruba ta di acuerdo. Pero, kico ta loke e acuerdo aki ta bisa? Di e poco cu nos a haya sa, ta cu si Citgo no por cumpli cu su obligacionnan, anto nan ta responsabel pa desmantela e instalacionnan. Concretamente ta trata aki di un suma di 150 miyon dollar cu nan mester paga. Si Aruba no cumpli cu su obligacionnan den e contracto, nos tin  e mesun suma colga riba nos cabes, y nos mester carga e gastonan di desmantela nos mes. Pues kico nos lo mester ta ganando pa bay di acuerdo cu nan no ta cumpli, si esey ta e caso? Nos no sa.

Di otro banda, si nan ta bin negocia un otro time schedule, pa den futuro nan bin logra haci tur cos pa e reapertura tuma luga na un fecha posterior, e pregunta lo ta kico ta sabiduria. En todo caso lo mester contempla henter e situacion, unda na e momento aki un di e operacionnan cu ta ganando placa ta den man di Citgo, cu ta e transshipment di crudo. Bon mira nan ta operando un actividad cu ta nos propiedad, pa paga e lease di henter e propiedad cu ne? Tanten cu nan no ta produci nada na e refineria, ta logico cu nan ta keda paga nos cu nos mes placa? Esaki sigur ta un di e puntonan cu mester subi mesa.

Awor nos propio opinion, cu no a cambia durante henter e proceso aki. Nos no ta mira un futuro pa e actividad economico aki, asina simpel. Y hasta si Citgo (PDVSA) dicidi cu nan no ta sigui, no ta recomendabel pa busca otro candidato, pasobra na e altura aki ningun compania di reputacion ta dispuesto pa inverti, pa varios motibo. Ta solamente e aventureronan nos por haya. Ni PDVSA mes aparentemente no ta interesa mas. Un ehemplo reciente: PDVSA a duna orden na un compania Frances pa diseña un tubo di gas natural di costa di peninsula te Corsou pa alimenta e refineria cu gas pa uza como combustibel. Un proyecto di 90 km… Nos a tende nan papia di un tuberia pa Aruba di poco mas di 15 km? No. Y sin gas ta dificil pa opera di un manera rentabel, punto.

Ta recomendabel pa Aruba sali di henter e pesadia aki di e miho manera posibel, cu menos costo posibel. Pa esey ta necesario actua cu transparencia, sin contract cu ta horca nos o cu tin elemento hasta contra ley aden.  No ta necesario pa keda kere cu nos no por biba sin e entrada di e refineria. Nos tin seis aña ta biba sin e empresa cu a trece mas contaminacion den nos historia, y nos por prospera sin e industria aki. E unico cos cu nos ta interesa pa sa awor ta, manera e dicho ta bisa: ‘a tera of pa lama.’Gobierno, goberna!