Atrobe prensa ta hayando denuncia nobo di wega cu tereno den e area di Malmokweg. Den e caso aki a duna orden na funcionarionan na Departamento di  Infrastructura y Planificacion (DIP) pa prepara emision di tereno den e area aki, mientras cu e area specifico ta cay bao di un destinacion diferente, pa motibo di cual no ta posibel emiti tereno aki.

E tereno na bista ta parti di e saliña di Malmok, segun e ley di ROP vigente describi como ‘wetlands’ (area berde) y no ta destina pa duna hende ‘berde’.  Sin embargo, e denuncia ta bisa cu dirigentenan di DIP a ordena preparacion pa emision di tereno aki.

Ademas entre e beneficiarionan ta figura, segun e denuncia, personanan menciona caba den otro denuncia di partimento di tereno, specificamente persona liga na un canal di radio cu tabata blanco di critica severo caba den e ultimo lunanan. Si esey ta resulta berdad, e pregunta ta anto ta ki dia e hendenan aki ta siña. Te hasta hues den e casonan den corte tocante emision di tereno y otorgamento di permiso pa hotel na Malmok a bisa e ministro encarga cu Infrastructura cu e ta dañando reis di nos estado di derecho! Y sin embargo, loke nos ta mira cu e mesun actuacion ta sigui, manera no tin mañan…

Por ta cu ta exactamente esey ta tumando luga, cu e incertidumbre si e gobierno aki lo bolbe pa un di tres periodo, ta haci cu prome cu ‘jump ship’, mester percura pa mas tanto posibel tur e simpatisantenan di partido cu por beneficia ainda, por beneficia prome cu ta laat? Esey por ta e caso, pero no ta haci e tipo di corupcion abierto y descara aki aceptabel.

Fuera di e fabor politico riba su mes, ta surgi e pregunta con ta para cu e responsabilidad di otorga tereno cu  por ta na riesgo na momento cu un desaster natural, manera un horcan por inunda e terenonan aki cu ta na nivel di lama practicamente, y… riba nos gasto mester rescata e hendenan aki? Ta nan ta insisti di haya tereno di forma corupto den e area no apto pa vivienda aki. Nos tin e ehemplo caba di casnan traha den rooi na varios luga, cu dia algo grave mester pasa, ta te den lama nan ta bay para cu nan cas. Banda di esaki, e solo hecho cu gobierno ta cuminsa emiti tereno cu ta cerca di un area residencial atractivo, pero tin caracteristica cu ta hacie no adecua pa vivienda, ta papia pa su mes.

Nos ta yegando e recta final di otorgamento di tereno, y sigur no tin pa 11.000 hende haya. Esun cu ta haya ainda, lo mester tin tremendo conexion den e partido na mando.

Si esey ta asina, ta bira tempo anto pa envolve e lider maximo tambe den e asunto. Y pakico? Pasobra e ta esun cu na ultimo instante no ta para e corupcion cu ta tumando luga den nos cara, sin un minimo di berguensa. Y no ta cuestion di un caso isola di corupcion, sino un cantidad cu ta involucra varios ministerio. Sin duda algun, e gobierno aki a surpasa tur record anterior di cualkier gobierno cu nos tabatin den 31 aña.  Y mester bisa tambe cu banda di tur e slogan, lema, consigna bunita cu e prome ministro a adopta y haci parti di su refran, ningun hende por acusa su persona cu den tur e añanan aki el a yega di menciona ‘bon gobernacion’ of ‘gobernacion drechi’ como meta di su gobierno, sikiera pa casualidad, den cualkier entrevista… Naturalmente cu tin hende cu ta bisa: ”net bon, no laga e papia tampoco di gobernacion drechi, pasobra e no ni sa kico esey ta.” Laga e sigui papia di ‘berde’, di refineria berde, di cinco strea, di bario di cinco strea, di caya di cinco strea, enseñansa di cinco strea. Na e altura aki, si Aruba por a bende strea, anto lo nos a sali di gran parti di nos debe caba.

Di otro banda, nos ta comprende, sin hustifica, e silencio di nos prome ministro dilanti tanto denuncia asina. Cu un ministro elimina caba riba acusacion di corupcion, esun cu mas denuncia y critica ta ricibiendo ta hustamente e ‘kroonprins’ di e partido, cu a dicidi e bataya interno di sublider na su fabor, cu salida di e ministro encarga cu turismo cu tabata su contrincante directo den popularidad. Si e mester haya su mes den e mesun situacion cu e esun cu ta bao investigacion caba, anto e pregunta ta cu kico e partido lo mester bay eleccion aki cuatro luna.

Y ta p’esey no tin ningun otro alternativa cu, no defende e persona publica y abiertamente talbes, pero di otro banda si trata di ignora tur loke ta bin dilanti den prensa y pretende cu nunca a pasa nada. Y si tin algo cu tur otro politico por siña di nos actual prome ministro, ta cu e sa bon kico pa bisa ora mester papia, pero e sa miho ainda ki ora keda keto…