Publicacionnan recien den prensa ta e motibo, segun compania di seguro Ennia, pa pospone publicacion di su cifranan financiero di 2015. Pero den Antilliaans Dagblad, e managing director tambe a admiti cu nan accountant KPMG a pidi un evaluacion adicional riba e balor di inversionnan cu Ennia a haci.
Banda di esaki otro publicacionnan a sali den prensa cu ta pone e compania den luz negativo. Het Financieele Dagblad (FD) cu a cuminsa cu esaki ora di publica un parti di un rapport secreto di De Nederlandsche Bank (Banco Central di Hulanda, DNB), a trece dilanti cu no tabatin preocupacion solamente cerca DNB y Banco Central Aruba. Cinco managernan halto di Ennia a bati alarma. Un di nan ta e managing director vigente, esta Gilbert Martina (oficina principal na Corsou).
Amigoe tambe a trece cu Banco Central Aruba a imponi mas supervision despues e managernan aki a trece e informacion aki dilanti.
E informacion aki no ta completamente nobo. E fuentenan ta basa nan mes riba un veredicto den e caso di e ex director di Ennia Aruba, Roger Schimmel, contra su dunado di trabou. Locual si e fuente Hulandes FD ta remarca ta e echo cu e tempo ey director Martina tabata expresa su preocupacion, mientrastanto su comentario recien riba e lek di rapport, ta cu segun e ‘no tin mobio pa ta preocupa’. Te ainda Martina no a duna claridad riba esaki.
Cifranan
Ennia, manera tur compania di seguro, ta obliga pa publica su cifranan financiero tur aña. E compania ta bisa cu nan tabatin tur cos prepara pa por publica nan dia 30 di juni. Pero nan a dicidi di pospone esaki na ultimo, mirando e publicacionnan cu a sali den prensa tocante e compania. Pa por haci esaki, nan mester a pidi Banco Central pa pospone publicacion y segun Ennia, Banco Central a bay di acuerdo cu esaki.
Sinembargo den e fuente Antiano menciona ariba, director Martina ta splica cu nan accountant KPMG no a acorda e cuenta anual 2015 ainda. Esaki pa motibo cu e accountant kier evalua e cifranan di inversionnan haci den mas profundidad.
E rapport secreto cu a lek den prensa, a mustra tambe e preocupacion di Banco Central di Hulanda pa locual doño Husang Ansary a haci cu fondonan di Ennia. Y tambe cu inversionnan di e primanan di e clientenan.
E rapport recien y e veredicto den e caso di Schimmel na 2013 no tabata e prome biaha cu ta mustra cu e doño no ta actua den bienestar di e compania. Na comienso caba na 2006/2007 ora Ansary kier cumpra Ennia, Banco Central di Aruba tabata preocupa pasobra no a logra di investiga su antecedente manera mester ta. Y tambe no a haya cu Ansary tabata nombra hende den hunta di supervision cualifica. Den sentido cu nan tabatin mucho experiencia financiero sea den mundo di seguro. Esaki Bon Dia Aruba tin di un fuente hopi confiabel. El a bisa cu Ansary entre otro kier pone spionnan di CIA den e hunta.
Asunto di Reino
E caso di Ennia y e rol di Banco Central di Corsou y St. Maarten a hala atencion di politico na Hulandes. Diferente parlamentario a haci pregunta na minister di Asunto di Reino, Ronald Plasterk, expresando tambe nan preocupacion. E minister a priminti cu lo atende e caso den e Conseho di Minister di Reino.
