Un Fokker-50 di InselAir mester a regresa cu emergencia diamars despues cu a constata problema cu e motornan. Esaki a sosode despues di 20 minuut cu e avion cu menos cu 40 pasahero a sali for di Barranquilla, Colombia.
E aerolinea ta bou critica pisa como cu departamento di aviacion civil di Aruba a ground 6 di nan avion despues di diferente incidente. Nos partner den noticia a publica cu e problemanan di siguridad cu e avionnan di InselAir ta conoci den e compania mes. Bon Dia Aruba a compronde cu e compania a kita e hefe di e departamento di mantencion na Corsou.
Insel a cambia tambe di directiva y e director nobo Gilles Filiatreault a indica awor cu nan ta deliberando awor si nan mester continua cu InselAruba. E compania ta sufri di un perdida di 1,5 miyon dollar pa luna awor, e tambe ta bisa. E director tabata na Aruba diamars pa papia cu e departamento di aviacion civil un rato.
Emergencia
Consulado Mericano a anuncia, cual Bon Dia Aruba a trece siman pasa, cu nan ta prohibi nan personal pa bula cu Insel. Un dia despues gobierno di Hulanda a prohibi su ambtenaarnan pa bula cu e aerolinea. Nan ta preocupa cu e siguridad di e avionnan. Tabatin varios incidente entre otro na december y januari unda presion di aire a baha den e cabina di e avionnan y asina nan mester baha cu emergencia.
Diamars tabata trata di problema cu e motornan. Den oranan di marduga e Fokker-50 mester a regresa rapidamente aeropuerto di Barranquilla pa motibo di e fayo tecnico. Na bordo diferente persona a spanta y algun a bira malo. Un di e pasaheronan ta Desiree da Costa Gomez, conocido presentando di programa na television.
Riba su Facebook el a habri afo contra e compania. “Hopi rabia mi ta riba Insel Air. Nos a caba di lanta vuelo for di Baranquilla pa Corsou. Despues di 25 minuut di pueblo capitan a anuncia cu nos tin cu bolbe bay Baranquilla bek pa un fayo tecnico. Susto di nos bida esaki ta. Tur hende a spanta! Ami a haya dolor di stoma. Asina aki si no por mas!!! Ami ta cla cu Insel Air. Ta un abuso di marca mayo esaki ta.”
El a nenga categoricamente pa bula cu e avion ey y a pidi nan pa baha su maleta. Minister di Economia di Corsou Eugen Ruggenaath a biaha urgentemente pa Hulanda pa atende e desaroyonan pa loke ta trata InselAir. Como administrado di islanan BES, Hulanda tambe tin e responsabilidad pa e vuelonan interinsular.
Ya anteriormente a bay un carta pa Hulanda pa mustra riba e parti aki. E compania mes no a duna informacion oficial ainda riba e caso aki.
