Diabierna den oranan tempran di mainta, Atraco Team (TBP) a tene un entrada hudicial na tres cas conhuntamente cu Ministerio Publico. E caso ta relaciona cu posesion di arma di candela.
Na e cas na Matadera a detene e homber J.R.M. Na e cas na Meiveld a detene e homber J.J.V. y na e cas na Driemasterstraat a detene e hombernan O.A.H. y R.J.H. Segun un comunicado di polis, tur ta local.
Durante e entradanan hudicial a confisca un arma di candela como tambe un cantidad grandi di droga.
Diferente unidad di Cuerpo Policial a forma parti di accion aki. Ta trata di Team di Aresto, Flex-Team , K-9 Unit, Recherche di Santa Cruz.No ta descarta cu lo tin mas detencion.
Un bon trabao di Atraco Team cu ta trahando incansablemente pa soluciona e casonan y como tambe kita arma di candela y droga for di caya.
Cuerpo Policial ta haci un apelacion pa es cu a sa algo of a wak algo pa yama e tiplijn di polis cu ta 11141. Bo ta keda anonimo.
