Dos atraco den menos cu 12 ora diasabra a trece hopi inkietud den comunidad. Un atraco tabata riba e joyeria Little Europe na Playa y e otro riba un señora di edad na Cura Cabay. Esun ultimo ta locual polis ta cualifica como un fenomeno nobo. Den sentido cu mas y mas atraconan ta sosode den casnan priva.
Manera conoci polis ta duna presentacionnan na companianan y tambe barionan pa conscientisa nan di kico ta e ultimo desaroyo den criminalidad riba nos isla y con por prepara riba esaki. Den e presentacionnan polis ta duna informacion tambe riba atraconan. Atraconan riba negoshi of riba caya ta algo cu pa hopi tempo por mira esaki ta sosodiendo na Aruba. Sinembargo atraconan den cas di hende ta algo no usual riba nos isla. Pero ultimo tempo esaki a cambia y polis ta bisa cu hende mester cuminsa prepara nan mes mas miho riba esaki.
Locual por mira ta cu tin un diferencia entre esun cu ta horta den cas, unda ladron ta haci esfuerso maximo pa no wordo descubri; y esun cu ta atraca e habitante (nan), hopi biaha tambe cu violencia y cu arma. Den e caso di e señora na Cura Cabay, dos homber a drenta y no a haci esfuerso pa sconde, pero hasta a dal e señora cu arma di candela riba su cabes. Den e caso aki tabata trata di dos homber cu tabata comunica na Papiamento. Nan a bay cu mas o menos 300 florin y un cellular.
Segun analisis di polis, e fenomeno di atraconan den cas priva tin di haber cu e situacion na Venezuela pasobra mayoria atracado ta resulta ta Venezolano. Pa nan e ta bala pena pa drenta casnan priva aunke e chens di haya hopi placa etc. no ta grandi. Sigur cu no compara cu un atraco riba un negoshi. Sinembargo pa nan, e tiki placa cu tin, ya ta hopi caba. Y e siguridad na casnan priva ta hopi menos cu esun di luganan comercial.
Segun informacion di polis atracadonan di negoshi, mayoria ta Venezolano tambe sinembargo hopi biaha nan ta haya yudansa for di hende local. Sea ta un conoci den siguridad of algo otro manera nan ta haya informacion for di hende local. E ultimo por sosode durante happy hour. Custumber di hopi trahado ta pa bay di biaha di trabou pa un happy hour, y bisti ainda den uniform of cu badge di trabou. Asina nan ta visibel pa esunnan cu kier haya informacion for di nan y e trahadonan ta mas vulnerabel como cu nan ta consumi alcohol tambe. Tin casonan asina conoci na polis, unda trahadonan ta drenta bar unda ta topa hende muhe y asina share informacion por ehempel cu no mester sali y cu por afecta e siguridad di e compania na unda nan ta traha.
Den e presentacionnan di polis pa companianan, nan ta duna e ehemplonan aki pa asina companianan por prepara nan mes miho. Nan tambe ta duna charla na habitantenan di diferente bario manera Bon Dia Aruba ya a trece dilanti caba. Un di e instrumentonan cu polis ta recomenda ta pa habitantenan cuminsa un vigilancia, uzando por ehempel un grupo den Whatsapp. Asina nan por informa otro di cosnan sospechoso den bario of pa informa ken su cas ta bashi pa motibo di vakantie.
Riba e potretnan por mira e cas di e señora na Cura Cabay, e joyeria na Playa y tambe e pickup y paña despues di e atracadonan di e joyeria. Polis a haya e pickup na veld di Aruba Juniors na St. Cruz.
