Aunke e caso di criminalidad rond di nos isla a aumenta e aña aki; San Nicolas ta e dos districto mas afecta, muy particularmente pa hobennan problematico, lanta sin niun sorto di structura.

Nan ta hobennan producto di un generacion cu a yega di confronta problema social; y aunke nan ta percura pa rehabilita nan; ta hopi laat caba. Ya cu mester warda e momento cu e hobennan aki ta cay cera y cu a yega di comete crimen pa despues bay educa y forma e hobennan aki. For di januari 5 caso di atraco a tuma luga den e districto aki y e resto tabata den e area turistico, Noord y Oranjestad. Sinembargo minister di HusticiaArthur Dowers a indica cu e no ta un caso severo di atraco specificamente na San Nicolas; ademas e autornan di e acto criminal aki no ta e mesun grupo cu a comete atraco aña pasa.

Sinembargo e no ta kere cu ta necesario pa bin cu mas estudio pa haya sa mas riba e causa di e tipo di atraco na San Nicolas. E mandatario a indica cu nan sa kico ta e problema. Ya cu ora e hobennan aki ta cay cera, e indice di atraco a baha den e districto di San Nicolas, un districto cu gobierno ta haciendo esfuerso y inversion grandi pa bira uno turistico. “E muchanan cu ta pone e crimen no ta bay stop djis pasobra otro minister ta bin. Nan no ta stop tampoco djis pasobra bo ta cera nan.”

Hobennan den criminalidad
For di aña pasa e mandatario a indica cu nos autoridadnan a mustra riba e echo cu tin un grupo di hoben na San Nicolas cu ta biba den un cierto bario; y cu ta sali specificamente pa atraca cierto hendenan cu ta bishita San Nicolas. Nan ta comete nan fechoria pa haya placa y nan ‘ta hobennan di nos mes’, e minister ta splica. E hobennan problematico aki no ta bon educa ni lanta, y menos bon forma. Nan no ta traha sino cu nan ta sinta warda nan victimanan pa atraca nan. Pero pio ainda cu tin biaha e hobennan aki ta haya sosten di e mesun famia. Sr. Dowers ta kere cu e berdadero solucion pa e hobennan aki ta esun di reeduca nan y rehabilita nan.

Banda di esey nan ta observa e generacion di hende cu tin bes ta den problema social y cu mester traha pa saca nan for di esfera ey y percura pa nan haya formacion y educacion. E ta kere cu e trayecto di “Siña Traha” ta un proyecto valioso cu ta busca cu muchanan cu no ta bayendo scol por haya un formacion pa bay scol y siña traha riba un ofishi. Tambe el a bisa cu den KIA nan ta trahando duro den e proceso di rehabilitacion di e hobennan aki. Tin varios persona envolvi –segun e mandatario- cu ta trahando programa nobo di rehabilitacion y formacion.