Jahruby Morris y Jason Mathilda, acusa di un atraco riba un empleado di pompstation, a ricibi un condena di cinco aña di prizon.
Segun un relato di e noticiero E Arubiano News, inicialmente e dos acusado a nenga nan participacion den e atraco y a nenga di declara. Den e ultimo sesion na corte a duna sentencia contra e dos sospechoso, conoci pa husticia.
Den e caso en cuestion, Morris y Mathilda tabata acusa di atraco arma riba empleado di un pompstation mientras e victima tabata transportando placa di benta di e dia di dos pompstation na banco. Dia 1 di april ultimo, e empleado a yega banco anochi laat cu un saco conteniendo mas di 47mil florin, na momento cu e atracadonan a saca arma riba e empleado y bay cu e saco.
Segun E Arubiano News, hues a duna veredicto cu e pruebanan presenta pa Ministerio Publico ta contundente, incluyendo e auto cu a uza den e atraco. Tambe tabatin declaracion di un testigo, kende lo a fia nan e auto pa e crimen, y tambe a ricibi un condena.
Ademas di atraco, Mathilda a ser haya culpabel di posesion di arma di candela y 10 bala. Mathilda y Morris a keda condena na cinco aña di prizon y mester paga 47mil florin of bay cera un aña mas.
E acusadonan tin un record pa casonan similar. Mathilda na 2009 a ricibi condena di 8 aña den prizon pa maltrato cu a conduci na morto, y apenas dos aña atras e tabata cera den KIA. Morris a haya un castigo di 10 aña di prizon na 2009, pa un serie di robo y atraco. Na 2015 el a sali liber, pero na 2018 a haya un otro condena di 3 luna di prizon relaciona cu droga.
