Atleta Shariska Winterdal lo reta su mes den e hazaña di aña 2020 ‘’E SPIRITO ARUBIANO’’

Dos aña pasa riba e fecha 15 di December 2018, Shariska Winterdal a completa algo cu ningun persona na Aruba a haci door di core 500km non-stop riba su road-bike, un hazaña pa un bon causa pa Stichting Frank Polanco.

Mas cu claro esaki ainda ta fresco den nos memoria unda Shariska a gana hopi respet y admiracion di nos comunidad pa e reto unico aki. Wel si nos tur a kere cu e la caba eynan, nos a ekiboca. E fechanan 11-12-13 december proximo, e atleta femenino Shariska Winterdal lo a reta su mes pa un super hazaña den 2020 cual lo bira un un ‘Double Ironman Distance’ cu a haya e nomber di E SPIRITO ARUBIANO.

E intencion ta cu Shariska lo purba na completa NON-STOP e double ironman distance cual lo bira un: 7.6km di landamento, 360km riba bicicleta, 84km coremento na pia. Shariska lo cuminsa diabierna dia 11 di December y caba diadomingo 13 di December sin drumi. Su calculacion pa finalisa e hazaña lo ta entre 30-35hora incluyendo e descanso den transito.

Shariska a duan in entrevista exclusivo cu 297 y ta cuminsa asina aki. Mi landamento mester cuminsa diabierna dia 11 pa 3or di atardi y si tur cos bay bon mi lo tin cu caba diadomingo marduga cu e parti di coremento. Mi a yama e challenge aki E Spirito Arubiano, cual ta representa e spirito di tur Arubiano cu apesar di tur loke nos a pasa e aña aki, nos lo sa di surpasa tur reto y obstaculo y nos lo demostra cu speransa ta e ultimo cos cu nos por perde y cu nos lo sigui lucha te final. E reto aki no tabata plania den cuminsamento di aña, e ta algo cu diripiente a presenta den mi mente durante di un di mi training nan, cu mi tabata preparando pa mi prome ironman cu mi mester a bay na California, pero cu a wordo cancela te otro aña. Di eynan e cos a cuminsa y asina mi a adapta full mi training y awo mi ta cla pa e challenge dificil aki.

E training nan no tabata nada facil, hopi biaha e preparacion ta esun mas duro, pero poco poco mi a hiba mi curpa na otro nivel. Mi tabata practicamente core cada 2 pa 3 siman 1 marathon. Mi a haci casi un distancia di un full ironman den un training y asina mi a custuma mi curpa di bay mas cada biaha”, Shariska a bisa.