Diasabra mainta trempan, Monica Pimentel, nos unico atleta Olimpico di Taekwondo cu a representa Aruba den e weganan Olimpico na Rio, a train e atletanan na e sero di tanki di awa na Alto Vista.
Monica Pimentel tin su mesun scol di Taekwondo cu ta carga e nomber di Impact Taekwondo. Despues di basta tempo cu deporte tabata para, unda cu no por a train y awo a para deporte atrobe, Monica Pimentel a train cu un grupo chikito di atleta manteniendo distancia y cu nan tapaboca bisti.
Training a bay hopi bon y e atletanan tabata hopi contento y cansa. E atletanan a comenta cu nan ta contento di por a wak nan amigonan di Taekwondo bek despues di Maart unda cu tabata tin e ultimo evento. Hopi atleta sa train na cas manera Deevah Loefstop kende a baha masha hopi peso y tambe a rek. Monica Pimentel tambe ta sinti e efecto di no por train y awo mester adapta e training na un nivel pa por train un grupo chikito den aire liber.
Monica Pimentel ta spera cu pronto COVID -19 por ta tras di nos lomba pa asina e por sigui cu training ariba un nivel mas halto pa guia e atletanan den e direccion Olimpico cu ta un experencia unico.
