Recientemente e atleta di rhythmic gymnastics Ashley Urbaneja a representa Aruba den e campeonato Centroamericano de Gymnasia Ritmica na Costa Rica na unda el a logra un total di cinco medaya pa Aruba. Den un entrevista cu Bon Dia Aruba Ashley ta conta di su experiencia, su trayectoria den e deporte y su metanan pa futuro.

Ashley, un hoben di 13 aña di edad naci na Venezuela, a cuminsa di un edad hopi jong den e mundo di rhythmic gymnastics. Na aña 2018 hunto cu su mama Ashley inmigra pa Aruba pa motibo di e circumstancianan na su pais y a reuni cu su tata. Desde su yegada Ashley ta activo den e deporte y tabatin e oportunidad pa representa Aruba na diferente ocasion.

El a conta cu despues di su yegada hunto cu su mama el a cuminsa busca un club di gymnastics cu tabata ofrece e disciplina di rhythmic gymnastics aki na Aruba. El a logra haya contacto cu coach Adriana Sevilla, cu ken te dia di awe ainda e ta train.

Pa loke ta su competencia mas recien na Costa Rica, cual a tuma luga di dia 29 di november pa 4 di december, Ashley a splica cu e tabata un competencia cu a conta cu mas di 150 atleta di diferente pais, manera entre otro Costa Rica, Guatemala, El Salvador, Nicaragua, Panama y Aruba.

El a sigui conta cu el a destaca den nivel 8 compitiendo contra un grupo di atleta di nivel avansa y a logra gana cinco medaya den total. El a gana un medaya di oro den e disciplina di ‘freehands’; medaya di plata den e disciplina di ‘ball’; medaya di brons den e disciplina di ‘clubs’; medaya di brons den e disciplina di ‘ribbon’; y medaya di brons ‘all-around.’

Ashley a expresa cu e tabata un sentimento hopi bunita di por representa Aruba y laga e nomber di isla bira conoci riba stage internacional den e mundo di rhythmic gymnastics.

El a sigui conta cu durante momentonan cu tabata cla pa subi e mat pa presenta su rutinanan, e tabata sinti un poco nervioso, pero e tabata corda riba palabranan di su mama y tabata concentra pa lubida di tur cos rond di dje y enfoca riba haci su miho esfuerso pa representa Aruba di e miho forma posibel.

“Esaki tabata mi prome competencia asina grandi y mi ta hopi agradecido na papa Dios na prome luga, na mi mama y mi mama, pa semper apoya’mi y na mi coachnan Adriana Sevilla y Melissa Kindilan pa tur mi preparacion. Prome cu mi presenta mi tabata papia cu mi aparatonan y mi tabata resa na Dios pa tur cos bay bon” el a expresa.

Anteriormente den luna di september Ashley tabatin e oportunidad pa representa Aruba durante otro competencia internacional di rhythmic gymnastics durante cual el a logra gana medaya di plata den tur disciplina.

Pa Ashley rhythmic gymnastics ta mas cu un deporte, e ta su pasion y un di su metanan ta pa logra competi riba nivel profesional den e deporte cu e stima. Parti di su meta ta tambe pa por competi profesionalmente cargando e nomber di Aruba. El a splica cu aworaki e tabatin e oportunidadnan pa representa Aruba den competencianan internacional pasobra ta trata di competencianan riba nivel di club, cual ta haci’e posibel pa e competi.

“Un di mi deseonan mas grandi ta pa mi por logra representa Aruba profesionalmente. Aworaki esaki no ta posibel pa motibo cu mi no tin paspoort Hulandes, pero mi tin fe cu un dia mi soño lo bira realidad y mi por hisa Aruba su bandera na competencianan grandi profesional. Na mesun momento mi ta desea di por tin e oportunidad di por ser reconoci aki na Aruba tambe, cual ainda tampoco no ta posibel, pero mi tin speransa cu esaki tambe ta un meta cu mi lo cumpli,” el a indica.

Por ultimo Ashley a tuma e oportunidad pa gradici specialmente papa Dios, su mayornan, su coachnan y tur persona cu di un ofo tro forma ta brind’e apoyo pa e sigui traha pa conkista su metanan. “Mi kier bisa danki na tur hende y tambe na e isla di Aruba cu a habri su portanan pa mi y mi famia y cu a brinda’mi tanto oportunidad pa progresa riba nivel personal den mi deporte. Danki di curason,” el a resalta.