Na Santo Domingo, Republica Dominicana cu ta e subsede di e Weganan CAC El Salvador 2023, bandera di Aruba a bula den e Centro Olimpico Juan Pablo Duarte cu Jenniffer Baez logrando medaya pa Aruba.
Diamars mainta trempan, e atleta Baez guia pa su coach Arianna Diaz, a competi contra e miho elenco di Centro America y Caribe den e disciplina aki na Santo Domingo. Esaki alabes tabata Jenniffer su debut oficial pa Aruba den poomsae den e Weganan CAC ya cu aña pasa ya caba Jenniffer a competi na Odesur, Paraguay.
Mester bisa cu Jenniffer a competi contra 6 atleta unda tur mester a ehecuta dos presentacion cada uno. Aki a conta e promedio di e dos ehercicionan ehecuta y a duna e punto final. Aki ta caminda nos competido Jenniffer a logra pa su prome presentacion 6.94 punto y pa su di dos presentacion 7.06 punto pa un promedio final di 7000 punto.
Cu esaki Jenniffer Baez ta keda na di 4 luga den e standing final pero mirando cu regla ta bisa cu ta e prome 4 atletanan ta ricibi medaya, automaticamente, Jenniffer y Aruba ta logra medaya di Brons. E pais di Costa Rica ta gana e competencia sigui pa Colombia, Panama y Aruba.
Pabien Jenniffer, coach Arianna, Aruba Taekwondo Bond y Aruba completo.
