E atleta Braima Dabó kende a yuda nos atleta local, Johathan Busby yega na e meta despues cu a bira malo den e competencia mundial di atletismo di Doha, lo haya un invitacion oficial di gobierno como un gesto di gradicimento pa su hazaña y bon accion cu nos atleta local Busby cu a capta e atencion mundial.
Prome Minister, Evelyn Wever-Croes a declara na pensa local cu gobierno a pensa hopi riba e gesto humanitario aki, ya cu e tabata un ‘acto asina bunita’ cu gobierno no kier pa e pasa sin importancia. E invitacion concreto lo wordo haci dor di Aruba Tourism Authority (ATA) cu lo tuma contact cu e deportista Dabó bin Aruba. E intencion tras di esaki ta pa Dabó bin conoce na Aruba y den cuadro di su bishita gobierno por dune un homenahe di gradicimento pa locual el a haci.
Tambe nan intencion ta pa laga e atleta di Guinea Bissao papia riba locual e mes a experiencia ya cu e ta bora un rol model. E prome mandatario ta haya cu esaki ta un gesto cu por wordo aplica tur caminda, y no solamente den un carera di atletismo.
Mientras tanto informacion internacional ta indica cu Braima Dabó a bira candidato pa e premio internacional Fair Play di Federacion Internacional di Asociacionnan di Atletismo (IAAF). Dabó su accion cu nos atleta Busby a haci un impacto den e mundo deportivo ora cu el a yuda nos yiu di tera logra e meta di 5 mil meter prome cu Busby a cay riba pista debi na su situacion fisico.
