Ayera den oranan di mainta, polis a keda manda cu urgencia na Boca Catalina pa un persona cu no ta duna señal di bida.
Na yegada di autoridadnan, paramedico di ambulance a descubri cu e victima ta Lodrico Briesen, un atleta di 59 aña di edad. Personal di ambulance a duna prome auxilio, pero lamentablemente esaki no a duna resultado. E circunstancianan di su morto a genera duda mirando su condicion fisico como atleta. A considera e opcion cu Briesen a bira malo den awa, cu consecuencia cu el a hoga.
Testigo cu a observa e sucedido a indica cu tabata mustra cu Briesen a haya problema den awa, pa loke un otro persona a sak’e for di lama y a hala atencion di autoridadnan pidiendo ayudo.
Informacion cu a circula den medionan local ta indica cu Briesen tabata custuma di landa den e area, y cu regularmente tabata competi den eventonan di triathlon y tambe tabata un entrenador. A bisa cu recientemente el a keha di un dolor na su pecho, pa loke a acudi na dokter, pero a dun’e cita te na proximo siman. Sinembargo, autoridadnan no a confirma cu esaki tabatin un rol den su fayecimento.
Condolencia na famia y sernan keri di Lodrico Briesen.
