Diabierna anochi, ATIA a tene su evento anual na Aruba Marriott Resort & Stellaris Casino, cu a wordo dedica na e echo di e reapertura di refineria na San Nicolas.
E director di e asociacion aki cu ta agrupa e miembronan di e sector di industria y comercio di nos pais, Sr. Ronald van Trigt a bisa cu como director di ATIA, e tabata testigo di e ceramento di e refineria Valero; y tambe di esfuersonan cu e gobierno a haci pa habri e refineria bek.
Tanten gobierno a dicidi inverti y crea un pilar nobo di nos economia yama turismo. Nos desaroyo turistico a crece, te ora el a bira e pilar mas importante di nos economia, y un periodo nobo di crecemento y desaroyo a nace. Sinembargo director di ATIA a indica cu ta di compronde cu aunke nos turismo a hiba nos economia pa dilanti, y ainda Aruba ta un di e islanan mas prospero den nos region, e diversificacion di nos economia ta keda esencial.
Diferente intento pa habri e refineria bek a wordo haci cu otro paisnan entre nan Colombia, Mexico y Brasil, ya cu mayoria di nos hendenan ta kere cu nos ta un pais bendiciona y oportunidad por wordo logra atrobe. E habrimento di e refineria a bira un realidad y pa prome biaha Aruba a tuma e decision di ta doño di e refineria. Director di ATIA a indica cu esaki tabata posibel danki na un esfuerso conhunto. E comunidad comercial y Aruba en general ta mira Citgo Aruba y Refineria di Aruba como un oportunidad nobo pa mas progreso pa nos isla y por ta e cuminsamento di un crecemento economico cu nos mester, segun Sr. van Trigt.
Evento
E evento aki a conta cu presencia di Gobernador interino, Sra. Yvonne Laclé-Dirksz, Minister Mike de Meza su colega di Economia, Sr. Richard Arends cu e anochi aki a bira su prome evento oficial cu e ta participa despues cu el a wordo huramenta como minister na gabinete di Gobernador. Ambos mandatario aki a participa activamente den e proceso di reapertura di e refineria. Igualmente tabata presente un persona clave den full e proceso aki, Sr. Alvin Koolman kende actualmente ta director di Refineria di Aruba N.V. (RdA) y di parti di Citgo Aruba tabata presente Sr. Alirio Zambrano kende ta e director di e proyecto aki.
Den su discurso di apertura, Sr. van Trigt a destaca cu e topico di evento aki ta regarda e futuro di nos isla. Ya cu e decisionnan y acuerdonan logra pa nos gobierno cu Citgo y Refineria di Aruba lo tin un impacto duradero riba nos economia. “Si e vision aki ta bira un realidad, nos economia lo diversifica creando mas clase media den nos sociedad”, el a bisa.
Impacto economico y social
Segun director di ATIA, e comunidad comercial, sindicatonan y inversionistanan ta mira e acuerdo logra cu emocion ya cu e tin un gran impacto den nos isla. “A traves di e persistencia nos ta para akinan awe. Nos ta spera cu e relacion cu Citgo y Refineria di Aruba ta uno duradero y nos ta spera cu e corporacion lo provee nos forsa laboral un trabao di calidad, educacion continua y responsabilidad social”, el a bisa.
Na final di su discurso, director di ATIA a bisa cu e expectativanan di nan miembronan den evento aki ta grandi. Nan tabata spera cu e personanan cu ta haci nan presentacion den nan evento anual por a lusa nan riba kico nan ta spera cu nos futuro lo mustra. Tambe riba e impacto cu e decision di a habri e refineria bek lo tin riba nos economia; y e soño di tur e ciudadano nan Arubiano pa logra un Aruba mas prospero. “Nos ta spera di compronde con e negoshi aki lo tin un beneficio riba nos partnernan”, el a señala.
ATIA ta spera cu tur asunto relaciona cu e proceso di reapertura di e refineria lo nifica hopi pa un Aruba mas prospero y di mas bienestar. Den nomber di e asociacion aki, Sr. van Trigt a gradici tur esunnan cu a haci esaki bira un realidad. “Nos sa di e cantidad di tempo y esfuerso inverti pa trece esaki te na e punto aki”, el a bisa.
ATIA ta spera cu nos tur lo crea un vision di confianza y e confidencia aki cu lo wordo converti den oportunidad nan creando nobo beneficionan pa nos comunidad, nos economia y nos negoshinan.
