Ayera mainta duana a tene nan reunion a consecuencia cu e trabou di saca container no por tuma luga. ATIA ta lamenta esaki y ta spera cu Sindicato di Aduana realisa con hopi Aruba ta depende di nan y ta haci un apelacion pa prome cu tuma un accion di cera nos waf, pensa ariba e consecuencia cu esaki tin pa pais Aruba. Esaki segun e relato cu nos a haya di ATIA.
Segun e relato, ariba esey, pa motibonan fuera di control di cualkier instancia, e barco for di Miami tabata den nos waf ayera mainta. ATIA: “Comercio y nos economia ta depende completamente di e cadena di importacion. Nos tur mester realisa cu si e cadena di importacion aki kibra, Aruba ta bira sumamente vulnerabel, y ta causa un scarsedad inmediato di producto esencial ariba nos isla.”
E barco concerni ta subasta Aruba cu casi 70% di producto for di Merca, entre otro berdura y fruta y un gran cantidad di otro producto pa comercio y pueblo. ATIA ta considera tur instancia envolvi den e cadena di importacion, partnernan importante pa comercio y nos economia, y ta aplaudi e cooperacion y coordinacion cu e instancianan aki sa duna pa nos importacion tuma luga eficaz.
Segun ATIA, atrobe nan ta trece e seriedad y consecuencia pa henter nos isla dilanti ora e cadena di importacion kibra, y e accion di Duana awe mainta ta un kiebro serio cu consecuencia hopi negativo pa comercio y nos economia, afectando entre otro nos pilar economico turismo, cu ta depende di container di producto friu pa hotel y restaurantnan, pero tambe comercio y economia en general.
ATIA: “Nos ta spera cu Sindicato di Duana realisa con hopi Aruba ta depende di nan y nos ta haci un apelacion pa prome cu tuma un accion di cera nos waf, pensa ariba e consecuencia cu esaki tin pa pais Aruba.”
ATIA ta spera cu e accion aki ta uno cortico y ta keda vigila e situacion cu a reina ayera mainta di cerca.
