Pa di tres dia consecutivo, gobernador di Aruba a tene su reunion di consulta despues di eleccion. Ayera el a reuni cu presidente di ATIA, Ronald van Trigt kende na salida a bisa cu como gremio comercial y industria nan a trece dilanti e puntonan cu semper nan a yega di vocifera. Nan ta punto di interes general pa nos economia y comercio.
E tabata prudente pa no divulga tur e puntonan cu ATIA a trece dilanti cerca gobernador di Aruba. Pero ATIA ta consistente pa boga pa un gobierno cu ta incluso y un gobierno cu ta scucha. Unda cu comercio tin un tarea importante.
E ta kere cu e tarea importante cu comercio tin ta esun di reactiva economia di Aruba. Pero nan mester haya e base di intensivo necesario pa asina negoshi por tuma luga di forma mas eficiente y productivo na Aruba. “Esey semper nos a para pe. Esey semper nos a boga pe.”
Tin otro topiconan di importancia cu ATIA a trece na consideracion di gobernador di Aruba den e ronda di consulta cu ta tumando luga pa e formacion di un gobierno nobo. ATIA ta haya cu nos ta para dilanti di un periodo cu no ta bay ta facil. Un di nan ta e relacion cu Hulanda y tambe e saneamento di nos presupuesto.
“E ta parti di e salud economico di un pais.” E ta considera cu ta bon pa un cierto control riba gasto di gobierno existi. Den un situacion asina ATIA ta haya mas cu importante pa e sector priva por haya mas intensivo pa laga nos economia crece. Sinembargo nan ta kere cu un gobierno riba su mes pa un proximo periodo, lo tin poco espacio pa haci esey.
