Recientemente sindicatonan a manda un carta manda pa gobierno relata na cierto expresionnan cu Minister President a haci, caminda ta duna di conoce cu tur Parlamentario, Ministernan y empleadonan publico lo mester bay entrega. Den e carta aki, e sindicatonan ta duna di conoce den nan palabranan:” na cualkier momento cu gobierno kier mishi cu e posicion huridico di empleadonan publico, esaki mester ta a base di acuerdo cu sindicatonan!”. E tono ta duna di conoce caba cu lo no ta un lucha facil.
E sector priva ta e fuente di entrada pa caha di gobierno cual ta paga entre otro salarionan di personal di sector publico. Awor cu sector priva ta sufriendo un di e golpinan mas grandi den storia, ta rechasa di extende un man pa yuda sector priva sobrevivi. Na momento cu e crisis pasa, sector priva ta esun cu lo mester purba recupera lo mas pronto posibel pa por pone nos economia funciona di nobo y cuminsa trece fondonan na e caha di gobierno atrobe.
ATIA ta haciendo su maximo esfuerso pa convence gobierno pa bin cu medidanan cu lo realmente yuda sector priva sobrevivi y recupera den un siguiente fase. Ta noble di parti gobierno pa kier yuda esnan cu a perde trabou, pero door di yuda companianan por medio di entre otro subsidio di salarionan y alivio den area di impuestonan cu ta yuda e cashflow di companianan, companianan lo por mantene nan trahadonan y prepara un plan di recuperacion pa na momento cu por, nan cuminsa opera bek.
Ta di lamenta cu companianan ta cerando nan porta, sea temporalmente of definitivamente, empleadonan ta perdiendo trabou of entrada y ainda sindicatonan di sector publico tin e pensamento cu e trahadonan di sector publico por keda sin sacrifica parti di nan entrada pa yuda nan pais surpasa e crisis aki na un manera solidario.
Ademas, cu un subsidio di salario, manera tur otro parti di reino a propone, lo por percura pa un suma mas grandi cu e 950 florin den saco di e trahadonan y un relacion continuo cu nan dunado di trabou.
Aworaki no ta e momento pa wak beneficio personal si no pa mustra curason pa nos pais y cuminsa wak con nos tur hunto por yuda nos pais sobrevivi y bay dilanti lo mas pronto posibel. ATIA ta urgi gobierno pa haci lo corecto y cuminsa tuma pasonan pa corta gasto y alabes ta spera cu sindicatonan por reflexiona pa aporta na un manera civico como parti di nan deber como sindicato.
