Gobierno te ainda no a yega na un acuerdo cu Hulanda. Al contrario, a pospone e decision di firma un acuerdo por medio di un fiansa pa por cumpli cu su obligacionnan financiero pa proximo luna. Sinembargo, loke algun ta considera un logro pa gobierno, ta parce di ta mas bien un posponemento di loke parce inevitabel.
Segun gobierno, Hulanda a haci algun cambio den nan proposicion sin consulta esaki cu Aruba. Hulanda na su turno ta declara cu esaki no ta e caso. E ehempel aki ta duna un ilustracion di e falta di confiansa cu ta domina e negociacionnan cu ta andando entre Aruba y Hulanda. Ta sumamente importante pa traha riba e relacion entre e dos paisnan y traha riba establece confiansa pa por yega na un nivel caminda cada partner tin e confiansa pa por adelanta den e negociacionnan.
Lamentablemente, e zonidonan negativo ta inunda e balor grandi cu tin den e hecho cu nos ta forma parti di un reino mas grandi. Como isla chikito, forma parti di e reino Hulandes ta trece trankilidad y confiansa, tambe den bista di resto di mundo. Ademas, nos mester realisa cu nos ta afortunado di por conta riba yudansa financiero di un pais cu si tin fondonan financiero no obstante e crisis enorme cu mundo ta pasando aden.
No por ignora cu e manera cu Hulanda a mara cierto rekisito na e di tres termino di fiansa no ta esun mas elegante y corecto, pero esaki ta duna mas rason ainda pa activamente traha riba e confiansa mutuo cu ta necesario pa por yega na un acuerdo cu tur dos pais por biba cune.
Aruba a prepara un masterplan cu ta contene varios reforma necesario, cual ta reformanan cu a wordo recomenda pa añas caba dor di diferente instancia local y internacional, pa transforma Aruba den un pais mas resiliente. Sinembargo, locual a sobresali den e masterplan ta e cantidad grandi di reformanan cu lo ta necesario pa nos pais. E problema ta cu tin escasez di profesionalnan necesario pa logra implementa tur e reformanan aki den corto tempo. Varios di e reformanan aki ta hopi urgente pa logra salvaguardia nos economia durante e crisis, y mayoria, manera entre otro flexibilisacion di leynan laboral, ta rekeri cambionan den ley. Firma un acuerdo cu Hulanda, no solamente lo kiermen ayudo financiero, pero alabes, y mesun importante, ta e ayudo tecnico cu Hulanda lo ofrece pa realisa e reformanan.
Por ultimo, no por subestima e efecto enorme cu incertidumbre tin riba nos economia. Tanten cu no yega un acuerdo cu por ofrece un cierto stabilidad, e confiansa den nos economia lo sigui abou, asina stagnando inversionnan, kibrando companianan y creando mas desempleo. Esaki lo por tin su efecto negativo riba criminalidad cu lo afecta nos pilar economico mas importante, mirando cu nos turistanan ta bishita Aruba paso e ta wordo considera un di e paisnan mas sigur den region. Nos economia mester un luz na final di e tunnel pa e por fortalece. Un acuerdo pa ayudo financiero y tecnico lo trece e confiansa necesario bek den nos economia.
ATIA ta spera cu gobierno por traha riba e confiansa entre e paisnan y asina sigui e negociacionnan pa yega na e miho acuerdo posibel lo mas pronto posibel. Nos economia ta sufriendo y no tin mucho rosea mas.
