Den conferencia di prensa riba diamars 10 di october 2023, Minister President di Aruba (MinPres) a informa pueblo di Aruba tocante e acuerdo firma pa e fianza di COVID na un porcentahe di 6.9%. Pregunta cardinal, cu ATIA a trece dilanti varios biaha caba, ta dicon no a firma na un porcentahe mas abao, pues e 3.1% of 5.1%, cu lo a scapa nos pais hopi placa.

ATIA a presenta den un press statement cuanto Aruba lo mester paga na interes den e siguiente 20 aña. Mester bisa cu a haci e calculacion basa riba un fianza annuitario. Despues cu ATIA por a lesa un copia di e acuerdo, por a tuma nota cu e fianza no ta uno annuitario pero e ta un linear.

Diferencia entre pago annuitario y linear

Un fianza annuitario ta uno cu e pago anual (mensual) ta keda mescos, por pensa riba por ehempel bo pago di hypotheek di cas. Linear al contrario e pago nan anual (mensual) ta cambia paso e total cu a fia ta wordo dividi pa e total di tempo cu lo paga e fianza back. Pues den e caso aki Afl. 915.5 miyon dividi pa 20 aña cu ta Afl. 45.8 miyon pa aña. E interes ta wordo calcula riba e montante cu ta “habri” ainda.

Pues pagonan na cuminsamento di e fianza ta hopi mas halto cu na final di e termino di pago. Por mira cu na 2024, Aruba lo tin cu bay paga un suma di aproximadamente Afl. 109 miyon, di cual Afl. 63.2 miyon lo ta interes. Adhunto por mira e diferencia entre e total di pagonan na 3.1%, 5.1% y 6.9% pa un fianza annuitario manera presenta anterior door di nos y un linear manera en berdad a wordo firma p’e.

MinPres a bisa den e conferencia di prensa cu lo bay sinta cu tur stakeholders pa splica dicon a tuma e decision y tambe con nan lo bay traha pa purba baha e porcentahe. Seguramente den e sesion aki nos di ATIA lo bay puntra ta kico Gobierno di Aruba ta bay haci pa no mas peso cay riba comercio y pueblo di Aruba. Kico nan vision ta pa por cumpli cu e pagonan specialmente 2024, pero tambe e ideanan cu tin pa refinancia pa baha e presion riba nos balansa di pago. Esaki hunto cu tur e otro reto nan cu tin den drecha caya (infrastructura), enseñansa (nos hubentud y futuro), of den seguridad di nos pais. Mester bisa si cu un siman despues di e conferencia di prensa, ATIA como gremio comercial y stakeholder no a haya un invitacion pa un reunion manera a wordo bisa.

 

ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association