Durante fin di aña 2017 pa cuminsamento di aña 2018 ATIA a forma parti di un werkgroep di december 2017 pa januari 2018, cu tawatin como meta pa bin cu algun solucion pa e maneho di desperdicio a corto, medio y largo plaso.

ATIA a forma parti di grupo a peticion di Minister di Desaroyo Teritorial, Infrastructura y Medio Ambiente.

Den e rapport final “Final Report Integrated Solid Waste Management Aruba” a recomenda pa e termino largo bin cu un ‘Request for Information’ (RFI) pa un asina yama “solid waste management facility with thermal, recycling and sanitary landfill”.  E werkgroep den su composicion original, a wordo disolvi asina e rapport a keda cla y no a forma parti di e proceso di RFI.

Segun e comunicado cu Bon Dia Aruba a ricibi ta identifica cu algun luna pasa ATIA a tuma nota cu gobierno a inicia un destaho pa yega na construccion di un incinerator. Tambe ATIA (tambe) a ricibi copia di e rapport di Arcadis (Verwerking van afval op Aruba) di dia 8 di juli 2019 cu ta hopi critico ariba plan pa construi un incinerator na Aruba como solucion pa nos desperdicio. Pa tal motibo ATIA a dirigi un carta na Minister ariba dia 30 di juli 2019 treciendo e siguiente observacionnan, preocupacionnan y preguntanan dilanti:

  • E problema di procesamento di desperdicio na Aruba ta un problema grave cu ta rekeri un solucion sostenibel. Minister di Finanzas, Asuntonan Economico y Cultura a publica un “Economic Policy” den cual e ta enfatisa e necesidad di crea un balance entre desaroyo economico y nos naturalesa. Ademas ta menciona “Circular Economy” como un di e pilarnan economico prometedor. Esaki, hunto cu e adopcion di e agenda 2030 di e Sustainable Development Goals di United Nations, ta desaroyonan y enfokenan positivo cu ATIA ta aplaudi. Parse cu e plan pa construi un incinerator sinembargo no ta esun mas sostenibel ni ta stimula un “Circular Economy” como pilar economico prometedor.
  • For di sector priva a bin un solucion alternativo, caminda lo exporta e desperdicio procesa y paketa pa wordo uza como combustibel pa un fabrica di cement. E fabrica lo reemplasa uzo di carbon cu e uzo di desperdicio procesa. Den e rapport di Arcadis cuater diferente metodo di procesa desperdicio ta wordo compara y nan impacto riba tereno social, economico, futuro perspectiva y medio ambiente y segun tal rapport un incinerator ta e opcion cu ta score mas abou pa Aruba. ATIA a pidi Minister su opinion riba e rapport aki y si algun estudio comparabel a wordo hasi di banda di gobierno pa e impacto di un incinerator prome cu e destaho a wordo anuncia y si un cu e otro ta motibo pa adapta maneho.
  • Ademas, ATIA a expresa preocupacion riba e hecho cu Minister a anuncia un cambio di ley, den cual lo obliga tur compania cu ta piki desperdicio pa hiba esaki exclusivamente na e compania estatal, Serlimar. Esaki lo duna Serlimar un posicion di monopolio y lo por tin como resultado cu companianan local, priva y estableci lo haya nan mes obliga di cera nan porta como cu no tin fluho di desperdicio mas pa maneha recicla y/o exporta. Esaki ta un desaroyo alarmante, ya cu e lo atacha nos sistema di comercio liber y lo crea un precedente indeseabel. Supone cu den un afan pa fortifica Landslaboratorium bin cu un proposito di ley pa “nacionalisa” su servicionan. Kico lo pasa cu e laboratorionan priva y estableci? Nan tambe lo mester cera nan porta? Den opinion di ATIA e cambio di ley pa fortifica e posicion di Serlimar ta bay contra e intencion delinea den e Economic Policy, caminda ta menciona cu mester stimula comercio y ‘entrepreneurship’ pa duna economia e impulso necesario y via esaki aumenta e entradanan di impuesto pa gobierno.
  • ATIA a puntra Minister tambe, si e rekisitonan pa cu e destaho publico pa e incinerator a wordo ahusta di algun forma of otro, ya cu no a ricibi ningun inscripcion pero a dicidi toch pa extende e periodo cu 90 dia. Kisas e falta di interes tin di haber cu e feasibility y rendabilidad di e proyecto aki, mirando e cantidad limita di sushi cu e isla ta produci?
  • Por ultimo, ATIA a trece dilanti e costo di haci negoshi na Aruba, cu durante e ultimo añanan a bin ta aumenta. A conoce un aumento di BBO y BAZV, a introduci e BAVP, salario minimo a wordo aumenta, e parti cu doño di trabou ta paga pa AOV a aumenta, e drempel di salario pa AOV/AWW a wordo hisa considerablemente, a conoce inflacion, cantidad di oranan di trabou pa siman a wordo corta, banconan a introduci costonan adicional pa compra y benta di moneda stranhero, grondbelasting a aumenta drasticamente, accijns a wordo aumenta, y e tipping fee pa comercio tambe a subi substancialmente. Na mes momento, e productividad den departamentonan di gobierno (cu excepcion di algun) no a mehora y e nivel di e debe nacional ta sigui riba un nivel iresponsabelmente halto sin cu tin plannan concreto y conoci pa un y tur pa cu con lo remedia e situacion financiero di pais Aruba. Realisacion di e proyecto di incinerator lo bolbe trece un costo adicional pa comercio y pueblo, cu na e momento aki no por carga mas.

Ariba dia 1 di augustus 2019, ariba invitacion di Minister, a tuma luga un reunion informativo pa varios gremio comercial tocante e proceso di procesamento di desperdicio na Aruba. Durante e reunion, Minister a describi e proceso cu a tuma luga pa yega na e decision di un destaho publico pa un incinerator y aunke algun di e preguntanan di ATIA a wordo trata durante e reunion ainda e preocupacionnan di ATIA no a wordo elimina. Pa tal motibo ATIA lo keda vigila e proceso di e destaho y di cambio di ley y lo keda en espera di e contesta di Minister ariba ATIA su carta di dia 30 di juli 2019.