Ayera mainta Aruba Trade & Industry Association (ATIA) a haci un conferencia di prensa pa trece dilanti e contesta na preguntanan y comentarionan cu nan a haya den gremio comercial y tambe di parlamentarionan pa loke ta trata implementacion di impuesto BBO na frontera cu tin fecha di implementacion dia 1 di juni.

Herrick Henriquez, director di ATIA, a sigura cu e ley mes di BBO na frontera no ta un ley nobo. Na 2020 a yega di presenta e ley aki pero door di pandemia di Covid-19 a para su implementacion.

Loke ta interesante pa ATIA, den caso aki ta cu nan ta hayando hopi informacion di parlamentarionan cu segun “ta bon” pero, e ley no ta cla ainda manera Bon Dia Aruba a publica den su edicion di diasabra ultimo indicando cu awor e ta na Raad van Advies y despues e mester bay parlamento pa por trata esey.

“Nos mes a puntra na parlamento pa haya un reunion cu nan tambe. Den pasado minister a bisa nos cu nos lo haya e draft di e ley cu ainda nos no a haya y e preocupacion grandi cu nos tin ta cu e ley aki mester bin na vigor 1 di juni y esey ta bay afecta full Aruba,” Henriquez a expresa.

E puntonan cu nan kier a trece dilanti di ley di BBO na frontera ta cu e termino cu mas ta bay afecta y cu ta determina con e ley aki ta hinca den vigor ta e termino “handelsgoederen” unda cu comunidad ta bay scucha e palabranan aki varios biaha.

E termino aki a haya su cambio na aña 2020 y awor na 2023 nan a compronde cu e termino a bin back. Un handelsgoederen ta e producto cu un hende ta importa y bende. Segun Henriquez nan kier a amplia e ley aki cu ora ta trece un producto na Aruba, e persona por traha riba e producto y despues por bend’e, “e ora e importancia di esaki ta pasobra mescos cu tempo di BTW ora ta importa un producto y rebend’e ta haya un credito, pasobra awor e BBO na frontera ta un prepago di e BBO cu un compania mester bay paga y despues nan ta haya un credito y paga e resto ora nan ta bende e producto y si nan no bende e producto,” el a bisa.

Esey ta e importancia di e termino handelsgoederen pa motibo cu e por cambia y e persona lo no haya e credito manera e ta hinca awor den ley of manera nan kier pone den ley.

Si e persona of e compania no a haya un credito pa e producto cu el a importa, el a paga un 7% pero pa e porcentahe na frontera e no a haya e credito, tin cu compronde cu e 7% ey ta un subida di e costo di producto, kiermen ora e prijs di e producto ora ta bay rebende ta bay ta mas halto debi cu no a haya e credito.

Riba rednan social nan a mira cu ta bisa cu tur hende ta bay haya un credito pero manera con ta interpreta e handelsgoederen door di expertonan y miembronan di ATIA, e handelsgoederen ta hopi specifico awor, loke pa Henriquez ta nifica cu no tin claridad awor di kico ta bay cay den e handelsgoederen aki “esey ta importante pa comerciantenan sa kico tin eyden pa nan por sa con nan mester importa e productonan of no.”

Pa Henriquez, esaki ta un termino cu por ta simpel; cu tur cos cu ta importa ta haya un credito ta limit’e na un handelsgoederen.

Por ehemplo, pa importa un cup, ta bende e cup aki. Si e cup no tabatin un tapa y ta pone un tapa riba dje, el a cambia. No ta e mesun cos, a importa tur dos apart y traha un cos nobo, no lo haya un credito di dje.

“Ya caba bo por imagina con hopi administrativo esaki ta bay ta y unda si y unda no. Esey ta e preguntanan cu nos tin: ki ora si y ki ora no, asina importante e handelsgoederen ta pasobra e ta bay afecta prijsnan. Esey ta algo cu nos kier claridad di dje y nos ta spera pa Departamento di Impuesto bin dilanti y tambe minister pa trece mas claridad,” el a sigura.

Den relatonan comparti riba rednan social tambe ta indica cu “comerciantenan mes a scoge pa BBO na frontera: “esaki no ta berdad, comerciantenan no a scoge esaki.” Henriquez a señala cu nan a manda hopi carta hunto cu e otro gremionan na unda nan a afirma cu nan kier BTW pero, no e manera con departamento di gobierno a present’e: “nan a presenta un BTW cu dos tarifa prome cu 18-6 y 14-6 y nos a bisa cu no, cu BTW mester haci’e manera IMF a duna e rapport na aña 2018, un porcentahe mas simpel posibel menos excepcion posibel y un base hopi amplio, esey ta e manera mas miho pasobra e ta bay simplifica e sistema di belasting na Aruba y tambe e ta bay hisa e compliances cu door di e operacion di BTW,” el a declara.

Den nan opinion si ta implementa e BBO na frontera di un manera corecto cu e parce BTW por haci’e temporario pa asina comercio y tur ciudadano di e pais Aruba cuminsa custumbra cu e manera di un BBO y un BTW cu ta bay bin.

Nan ta puntra nan mes si e impuesto aki na frontera ta necesario ainda debi cu si ta wak e rapport di Banco Central di februari cu a sali na cuminsamento di mei, nan ta wak cu entrada di gobierno a subi hopi y entrada di BBO a subi 10.6% mas.

“Si tin mas entrada di BBO mester di un BBO na frontera? Mester di un belasting nobo cu nos tur tin cu bay deal cune? Y tambe nos tin cu reevalua esaki pa wak si por ta no mester bin cune 1 di juni cu ta aki dos siman,” el a sigura.

Esey ta e parti cu nan kier a trece dilanti pa motibo cu mester wak bon kico ta e handelsgoederen pa motibo cu esey ta bay determina den ley aki vooral e BBO na frontera cu ta bay tin mas cambionan den ley pa lo cual nan ta wardando riba dje for di 1 di maart “nos kier wak esey pa por haya un reunion den parlamento of cu minister atrobe pa wak con echt esaki ta bay afecta e mercado.”

Segun algun parlamentarionan di partido MEP a sigura den comunicadonan pa prensa, BBO na frontera no ta supone di laga prijsnan di producto subi y cu ta comerciantenan kier abusa di pueblo pa prijs. Pa esaki Henriquez a afirma cu loke nan ta papiando ta e presentacion cu Departamento di Impuesto a duna na parlamento y tambe loke minister a splica na parlamento, pero “tecnicamente e no mester a haci’e, dependiendo kico ta un handelsgoederen y kico ta e categoria di esey, eynan nos ta wak cu e problema ta bay sinta,” el a finalisa.