Como gremio comercial ta sumamente importante pa keda na altura di situacionnan internacional cu por tin un efecto riba nos mercado local. Un situacion asina ta pasando den mundo bancario actualmente. E articulo aki ta pa informa ariba kico a causa e crisis, e efecto cu e tin mundialmente, y kico esaki por significa pa Aruba su economia local.

Causa

Por a tuma nota cu den e ultimo 2 siman 3 banco regional na Merca, Silvergate, Silicon Valley bank, y Signature Bank. Otro factor cu a hunga un rol grandi ta cu Credit Suisse, un banco sistemico mundial a wordo tuma over door di un di su competidonan mas grandi yama UBS. Un banco “regional” na Merca tin un balans total di entre $10 – $100 biyon. E banconan mas grandi mes na Aruba ta wordo considera un “Community” Bank pasobra nan tin un balans total te cu $10 biyon.

Na Merca tin e asina yama Federal Deposit Insurance Company (FDIC), cu ta sigura tur cliente cu tin deposito den un banco te cu $250,000. FDIC a tuma over e banconan concerni pa asina sigura e deposito di nan clientela, pero tambe reorganisa of bende e banco nan den problema. Credite Suisse, cu den pasado tawata tin basta problema caba a wordo cumpra pa su rival UBS pa $3.25 biyon.

Efecto Internacional.

E efecto ta uno interesante, pasobra cinco di e Banconan Central mas grandi di mundo a anuncia un accion coordina pa asina sigura y stabilisa e sistema financiero internacional. Banconan Central di Merca (Federal Reserve), Europa (European Central Bank), Inglatera (Bank of England), Suisa (the Swiss National Bank), Canada (Bank of Canada), y Hapon (Bank of Japan) a anuncia cu tin suficiente likides pa asina purba calma e situacion turbulento andando den mundo financiero.

Ariba 22 maart Federal Reserve a anuncia cu nan lo subi interes cu 0.25% di 4.75% pa 5%, pa asina sigui purba baha inflacion. Mundo ta den un situacion di inflacion halto y interes ta subiendo. Interes ta subi normalmente den un situacion inflatorio pa publico purba “spaar” mas. Ora interes ta abou ta mas cumbiniente pa inversionista pasobra banconan kier pone mas likides den mercado. Por a tuma nota tambe cu mercado nan na Merca, Dow Jones y Nasdaq ta stabiel.

Efecto Local

E efecto pa Aruba ta wordo premira ainda cu lo ta minimo, pero si nos mester keda vigila e situacion internacional, pasobra Aruba semper ta retrasa pa sinti e efectonan internacional. Na 2008 den e ultimo recesion, Aruba tambe a sobrevivi cu efecto local minimo compara cu otro paisnan. Por mira cu ariba 16 di maart 2023 Banco Central di Aruba a mantene e reserva obligatorio na 25,5 porciento pa asina garantisa cu tin likides amplio pa nos mercado. Likides amplio ta importante pa mantene e balor y stabilidad di nos florin specialmente den un temporada di inflacion halto di 5.5% determina pa Banco Central. Tambe nos a tuma nota den rapport di Banco Central di januari 2023 cu e ratios nan prudencial bancario ta bon. Aki nos ta nota cu e ratio di likides ta 27.9% (20% ta mínimo), e “Capital Adequacy Ratio” ta 34.4% (16% ta e mínimo) y e ratio di deposito compara cu fianza ta 60.1% (maximo ta 80%). Kico esaki ta nifica ta cu banco nan local ta resiliente y tin likides amplio.

ATIA como gremio comercial lo keda vigila e situacion internacional y local pa asina informa debidamente su miembronan y comunidad en general.