ATIA recientemente a manda un comunicado di prensa unda a analisa e efecto di e welga di wafnan na Merca riba comercio di Aruba.
Como gremio comercial ta sumamente importante pa keda na altura di situacionnan internacional cu por tin un efecto riba nos mercado local. Un situacion asina ta pasando den mundo di logistica actualmente na Merca door di un welga riba wafnan na costa oost y e asina yama “Gulf Coast”, cu ta afecta e sector di exportacion/importacion, transporte maritimo y maneho di suministro di mercancia (“supply chain management”). E articulo aki ta pa informa kico esaki por significa pa Aruba su economia local.
Causa
E causa pa cu e welga nan aki ta un impasse den negosiacion entre e sindicato International Longshoremen Association (ILA) y dunador di trabou U.S. Maritime Alliance (USMX). ILA ta conta cu aproximadamente 45,000 miembro den region oost y na e “Gulf Coast”, cu ta representa 40% di empleadonan di USMX cu ta maneha y opera e wafnan afecta.
Tin dos punto primordial trancando e negociacion:
1. ILA kier un subida di salario di 70% gradualmente den e proximo 6 aña. USMX a ofrece un aumento di 50%, cu a wordo rechasa pa ILA.
2. Limita automatisacion di operacionnan riba e wafnan, paso hopi waf mundialmente ta optando pa usa mas robot y vehiculo autonomo pa haci trabou di carga y baha container di barconan.
Efecto na Merca
Un estudio di Oxford University ta aproxima cu e welga aki lo por costa economia di Merca alrededor di 1 biyon dollar pa dia, afectando tur sector. E welga ta afectando tambe e sistema di transportacion via trein, den tur region, pero specialmente transporte pa costa west di Merca. Pero e costa west di Merca tampoco por acomoda e demanda pa cambionan di ruta, paso e wafnan ta yen caba te cu november.
Pa por sigui ofrece servicio hopi compania di carga a cuminsa usa rutanan alternativa pa por garantisa servicio pa nan clientenan, pero ruta alternativa kiermen cu lo tin costo adicional paso e ruta no lo ta e ruta di mas eficiente of mas cortico. Pues aki por papia di un subida di costo di flete y tambe transportacion cu lo dura mas tempo pa yega su destino.
Tambe por a tuma nota cu e wafnan mes lo cobra un tarifa extra pa e interupcion aki cu lo ta $1,500 pa un container di 20 pia, $3,000 pa 40 pia y $3,780 pa 45 pia. Si no tin solucion, e cobranza nan aki por cuminsa ya for di 11 di october proximo, y lo wordo usa pa cubri gastonan operacional cu ta bin extra pa asina por sigura un interupcion minimo di e fluho di mercancia pa clientenan.
Efecto Local
E efecto pa Aruba ta wordo premira ainda cu lo ta minimo, si yega na un solucion pronto. Si no yega na un solucion, ATIA y su experto nan ta premira cu prijsnan lo subi paso e prijs di flete di e container ta subi. Y aki na Aruba nos ta paga impuesto di importacion riba e costo di producto, seguro, y flete, e asina yama “CIF-waarde” cu ta wordo usa pa calcula e “Douane waarde”. Pues ta sumamente importante pa tur comerciante keda vigila e situacion, pa por planea adecuadamente, ya cu nos ta drentando temporada di mas druk di aña. Director di ATIA a tuma contacto cu algun miembro cu a sigura cu nan a tuma nota di e situacion aki, ya for di algun tempo caba, y a tuma pasonan pa tin inventario adecua pa e temporada aki.
ATIA a wordo informa cu tin un paro temporal riba reservacionnan di “reefers” (container friu) na full e costa oost di Merca. Esaki lo por trece un consecuencia cune, si e welganan continua, cu lo por tin chance di
un escasez di productonan fresco, manera fruta y berdura paso esakinan ta bin fresco semanal den “reefers”.
Pueblo mester tene na cuenta cu prijsnan lo no solamente subi si e welga prolonga, pero tambe hasta si yega na un acuerdo. Operador di e wafnan mester por paga nan trahadornan y e unico manera pa por haci esaki lo ta pa subi tarifanan specialmente si inversion di automatisacion no ta posibel. Y manera nos ta consciente di dje, esaki lo wordo refleha den nos prijsnan local tambe, paso mayoria producto ta wordo importa.
Aki ta unda Gobierno di Aruba (GOA) por yuda pa sigura cu poder di compra di pueblo no bay mas atras. E suplica di ATIA ta pa GOA reevalua y modernisa nos leynan di importacion. Na 2021 caba ATIA y otro gremio comercial a manda carta pa Minister di Finanzas y Cultura cu e peticion pa cambia, via di un “Ministeriele Beschikking” e manera pa calcula impuesto di importacion di CIF-waarde pa Free on Board (FOB) Shipping. E diferencia entre CIF y FOB ta cu den FOB costonan di seguro y flete no ta wordo inclui, pues bahando e suma cu ta wordo usa pa calcula e impuesto di importacion yudando asina pueblo, commercio y stimula economia cu lo yuda caha di GOA tambe, un win-win-win.
ATIA como gremio comercial lo keda vigila e situacion internacional y local pa asina informa debidamente su miembronan y comunidad en general.
ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org, y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association
