ATIA ta bisa cu nan y e comercio ta preocupa cu no ta bahando carga na tempo den e ‘temporada crucial pa comercio’.

Nan a saca un relato ayera unda nan ta bisa cu nan a ricibi ‘un cantidad substancial di reclamo y keho di comercio cu netamente den e temporada cu comercio ta depende hopi ariba dje, cual ta fin di aña, diripiente tin un cantidad di container cu no ta yega/wordu baha na Aruba’.

ATIA a trata di haya sa ‘exactamente kico ta pasando’ y no oficial a bin tende cu un barco cu mas di 100 container a duna aviso adelanta cu lo yega Aruba laat pero no obstante, no a ser acomoda pa baha container mesun dia. Consecuentemente e barco aki a sali bay cu tur e containernan destina pa Aruba pa bolbe despues.

“Comercio ta depende pa casi 100% di productonan cu mester wordo importa di exterior.
Pa esaki comercio ta paga un prijs sumamente halto pa servicio di baha y importa e containernan aki for di waf.”

ATIA ta bisa cu nan tambe a tuma nota cu ‘pa motibo di un decision pa no acomoda e barco aki pa baha su carga, un gran cantidad di producto no ta disponibel ariba nos isla, entre otro producto cu mester den sector hotelero y restaurant(nos pilar economico principal) pero tambe diferente otro articulo cu mester pa tur sector di nos economia’. “Un gran cantidad di e containernan aki ta contene producto den container friu cu lo mester warda awor pa wak si esaki lo drenta Aruba fin di siman.”

Segun e organisacion tin ‘tension bou di trahadornan di Astec’. “Un interupcion di servicio di container den e temporada di fin di aña lo tin consecuencia desastroso pa Aruba su comercio. Pa e motibo aki, ATIA ta haci un apelacion urgente ariba e partidonan envolvi pa tene cuenta cu e bienestar general di Aruba y comercio den e temporada crucial pa comercio, cu ta temporada di fin di aña.”

ATIA lo trata di ricibi informacion di Astec pa haya sa kico ta causa di e ‘retraso serio’ aki, y purba evita cu e situacion aki ta empeora. “Nos ta ricibi informacion cu na e waf nobo, aunke cu tin espacio pa acomoda y baha 2 barco pareu, e compania encarga, no ta haci un excepcion di atende 2 barco. Con por ta posibel cu den un periodo crucial pa comercio ta keda implementa cu ta un solo kraan y un solo slot ta wordo uza pa baha container? Nos tin e facilidadnan completamente nobo pa atende cu 2 barco pareu den nos waf. Pakico no haci uzo di esaki ora tin hopi barco pa atende of ora cu tin emergencia?”

Nan ta sigui cu: “E consecuencia di e maneho aki ta naturalmente pa comerio cu ta keda sin producto y ta perde benta. E consecuencia ta pa pueblo cu no por ricibi producto cu nan ta custumbra cu ne. Aruba ta un isla cu mester di un sistema sumamente eficiente den e proceso pa drenta mercancia. E siman aki ta mustra cu nos no t’ey ainda, y cu falta hopi pa e proceso mas crucial pa comercio y Aruba su economia, funciona na un nivel aceptabel.”

Bon Dia Aruba lo purba haya un reaccion di Astec y tambe APA mas pronto posibel riba e asunto aki.