Pa ATIA ta sumamente dificil, pa no bisa imposibel, pa gobierno purba di introduci un serie di mecanismo economico y decisionnan pa atende cu e problemanan social, sin tur esunnan cu ta participa den economia na mesa.

Tur e asuntonan socioeconomico ta exigi cu tur partnernan bon hunto, asina presidente di ATIA, Ronald van Trigt a laga sa. “Nos no por soluciona cosnan nos so, pasobra nos no sa con e otronan ta reacciona.”

ATIA ta haci un apelacion fuerte pa bin cu un dialogo of encuentro nacional, aunke e palabra dialogo a haya un contexto un poco negativo. E gremio aki ta haya cu tur canal mester ta habri pa asina cada ken trece su puntonan dilanti, pa wak con hunto por soluciona esaki.

Problemanan social y laboral mas serio
Esaki despues cu gobierno a anuncia sorpresivamente un aumento di salario minimo. Pa e gremio comercial aki e anuncio di minister di Labor pa aumenta salario minimo ta mas complica cu djis bisa cu ‘nos ta bay hisa e sueldo di mas abou’.

E decision aki ta pone un presion riba henter un organisacion y structura, ya cu tur structura di salario ta bay subi te hasta esun cu ta gana un salario moderado di pa ehempel 2 mil. Ainda no ta mucho cla di cuanto e subida di salario minimo ta bay ta. Pero si ta pa ehempel 100 florin, e ta un subida di casi 6%. Sr. van Trigt ta haya cu un aumento asina ta uno excepcional den nos region.

“Nos mester wak den nos region na unda den un solo tiro nos ta aumenta un sueldo cu 6% of 7%, sin cu tin dialogonan serio pa e consecuencianan cu esaki por tin.”

Presidente di ATIA a declara cu nos tin casonan serio di studiantenan cu a drop out y cu no a sigui studia. Igualmente nos incentivonan pa e hoben profesional cu ta bin bek no ta suficiente tampoco. Esaki ta un punto cu ATIA como gremio kier papia di dje.

Akinan na Aruba, basicamente nos tin un solo tipo di salario considerando cu nos ta un pais chikito. Mientras cu den otro pais tin diferente tipo of nivel di salario, pa ehempel salario di sector pa e trahadonan cu ta eherce un tipo di trabou specifico. Pero na Aruba no tin e mecanismo aki y e ta lamenta esaki. Un mecanismo cu por stipula cuanto un hoben mester por gana y incentiva comercio pa tuma nan na trabou tambe ta necesario.

Diversificacion di economia den cierto area pa ATIA tambe ta keda un tema importante pa nan. Considerando cu turismo ta nos base economico, unda aña pasa a keda raporta un 85% di ocupacion di cambernan di hotel, locual ta haci Aruba un modelo di turismo den Caribe.

Te hasta ATIA tin indicacion cu un par di mil camber mas ta bay wordo construi. Sinembargo e gremio aki ta mira cu nos ta bayendo den e mesun rumbo, ya cu turismo ta e tipo di economia unda nos tin un base hopi grandi di hendenan cu ta haci trabounan relativamente simpel y un top basta chikito cu ta haci trabou mas relevante. Pues nos lo sigui importa trahadonan.

Diversificacion ta un topico cu ATIA ta bin papiando di dje basta aña, pero cada biaha cu ta bin cu mas hotel of amplia e cantidad di camber, e posibilidad pa diversifica economia ta keda mas restringi. “Nan ta decision cu nos hunto mester bay haci. Con nos kier wak Aruba aki un par di aña”, segun presidente di ATIA.