Relaciona cu e reunion publico den Parlamento awe pa trata e ley di BBO na frontera, Aruba Trade and Industry Association (ATIA) a dirigi un carta na minister di Finanzas, Xiomara Maduro como tambe director di Departamento di Impuesto, Luenne Gomez-Pieters,
Den e carta, ATIA ta indica cu nan a tuma nota cu awe dia 5 di juli 2023, entre otro asunto, ta bay discuti BBO na frontera durante un audiencia publico den Parlamento. Nan ta indica cu no ta cla si a sugeri of haci algun cambio na e ley como resultado di e sesionnan informativo y e input di sector priva.
ATIA ta informa cu hasta despues di e sesionnan di informacion, ainda tin hopi incertidumbre entre comerciantenan local, specialmente riba e tema di “handelsgoederen,” y con prijs ta bay ta afecta en realidad cu introduccion di e ley aki. Ta un hecho cu prijs ta bay aumenta, hasta pa e companianan cu solamente ta bende bienes comercial, ya cu por ehemplo e coolernan, reki di paña y cash register no ta bienes comercial y pues esaki ta aumenta gastonan operacional.
E miho opcion pa yega lo mas cerca cu por na un “sistema di BTW” lo ta pa simplemente elimina e definicion di “handelsgoederen” for di e ley, loke ta nifica cu tur articulo importa pa negoshinan lo tin derecho na un credito di BBO (offset), cual no ta bay aumenta gastonan operacional pa e companianan – y pues no lo conduci na aumento di prijs. Ademas, segun ATIA ta menciona den nan carta, e opcion aki ta facil pa ehecuta pa tanto entrepreneur como Departamento di Impuesto (DIMP) y lo resulta den mayor cumplimento y pues mas entrada pa gobierno.
Si esaki no ta posible, ATIA ta considera cu mester clarifica e alcance di e definicion sea den e ley of al menos den e nota splicativo di e ley. Definicionnan cla ta evita discusionnan, cu ta beneficioso pa comercio, DIMP y entrada di gobierno.
ATIA ta pidi feedback di e minister pa yuda haci e sistema di impuesto di Aruba uno cu por traha den practica.
E puntonan aki ta similar na esnan expresa pa AHATA y AFBA. Por lesa mas di esaki riba pagina 2.
