Bon Dia Aruba a haya copia di un carta cu ATIA, AHATA y Camara di Comercio (KvK) a manda pa ministro encarga cu Desaroyo Teritorial, Infrastructura y Medio Ambiente, Otmar Oduber (POR) dia 2 di september, riba e tema di procesamento di desperdicio. Parcialmente e carta ta un reaccion riba e carta cu e ministro a manda como contesta riba un carta manda pa ATIA dia 5 di augustus 2019.

E gremionan ta argumenta cu den pasado recien, ATIA en berdad a participa na e grupo di trabao encuanto e plan nacional, cu a resulta den un rapport den cual a recomenda un Request For Information (RFI) pa identifica e miho solucion/tecnologia pa Aruba, pero cu nan no a participa den e proceso mes di RFI cu finalmente a recomenda un instalacion ‘Waste To Energy’. Y cu ATIA su preocupacion no tin tanto di haci cu un maneho integra y nacional di e tema, pero cu e persistencia den un alternativa cu, segun nan, no ta cuadra cu maneho di e gobierno aki, y contra cual, a pesar di e splicacion ministerial, nan ta mantene un reserva grandi for di perspectiva di medio ambiente, sostenibilidad y finanzas.

E gremionan ta anuncia tambe cu mientras tanto nan a haya un presentacion di Arcadis, e consehero externo cu a produci un rapport al caso pa Meta Corp/EcoGas. A base di e presentacion aki, e gremionan a keda cu algun pregunta cu nan ta comparti cu e ministro.

A comprende di e ministro cu e proceso di RFI a keda concretisa den un rapport y si e rapport aki ta disponibel y cu e gremionan por haya copia. Tambe cu, pa por evalua ki tipo di instalacion WTE ta apto pa Aruba, e cantidad di desperdicio ta importante, pero esaki tumando na cuenta ki tipo di desperdicio nos tin na Aruba y cuanto tin disponibel di cada tipo. E gremionan ta interesa den haya sa si gobierno tin un ‘break-down’ di tipo di desperdicio y cantidad pa cada tipo, y si ta tuma esaki na cuenta den escogencia di e tipo di instalacion ‘WTE’.

E gremionan ta desea di sa kico ta e cantidad di desperdicio cu gobierno lo garantisa den e proceso di e Request For Proposal cu lo haci pa e instalacion WTE. Tambe si a haci investigacion riba efecto di e emision di e instalacion WTE riba calidad di aire y riba medio ambiente, y si nan por ricibi e rapport aki. Seguidamente e pregunta unda tin pensa di pone e instalacion aki y con ta atende e emision di gas toxico y si ta existi un plan pa controla y limita e inclusion di material toxico den e instalacion WTE aki.

Ta referi tambe na e rapport ‘Final Report Integrated Solid Waste Management Aruba’ unda ta recomenda pa uza e anterior obranan di cobamento, pa yena nan cu desperdicio inerto. Despues por duna e sitionan aki uzo pa recreacion, pa parke solar o actividad deportivo. Pregunta na ministro ta pakico no a considera e alternativa aki na luga di e instalacion WTE.

Finalmente e gremionan ta pidi atencion pa e altura di e ‘tipping fee’ (e suma pa paga ora entrega desperdicio na Serlimar) y ta enfatisa cu sector priva y comunidad no por carga gasto extra den e sentido ey na e momento aki, y ta haya importante pa sikiera duna un indicacion con halto esaki por bira den e caso di un instalacion WTE. E gremionan ta pidi un reunion cu e mandatario pa por expone nan punto di bista.