Aruba Trade and Industry Association (ATIA) a reuni cu prome minister Evelyn Wever-Croes ayera 20 di mei pa asina dialoga ariba algun punto y tema di importancia pa e asociacion. Mediante un comunicado di gobierno, prome minister a informa ariba e diferente puntonan cu a bin dilanti durante e reunion aki.
Den luna di april ATIA a scoge su hunta directiva nobo pa aña 2024-2025. E hunta a eligi Sr. Danilo Werleman como e presidente nobo, a reeligi, Sra. Gina Habibe como vice-presidente, Sr. Enrique “Tito” de Cuba como secretario y Andrew Harms, como tesorero. A eligi tambe e reemplasantenan di e tesorero y secretario cu a bira Sr. Fred Steeghs y sra. Jenniffer Figaroa-Guzman respectivamente.
E prome mandatario a reuni cu e presidente nobo di e directiva y e director di e asociacion, sr. Herrick Henriquez. Un di e topiconan importante pa ATIA tabata cu a bin dilanti ta e funcionamento di e Departamentonan di Infrastuctura, DIP y DOW.
Durante e reunion prome minister a splica cu den caso di DIP, ya gobierno a cuminsa tuma diferente accion y un di nan ta dirigi specificamente pa adelanta peticionnan pa tereno. A informa ATIA tambe cu tin un reorganisacion andando na e momentonan aki den departamento di DIP y a haci investigacion pa mira cual ta e riesgonan cu ainda por tin den e proceduranan cu por conduci na corupcion na cierto momento.
Otro topico cu a bin dilanti durante e reunion, cu ta uno cu tin atencion di gremio comercial en general, ta e tema di escasez di trahado y e efecto cu esaki tin ariba e diferente sector na Aruba. Pa algun tempo caba gremio comercial a bin ta expresa nan preocupacion pa loke ta e topico aki y informa di e consecuencianan cu esaki a trece caba pa cierto comerciantenan cu mester a opta pa cera nan negoshinan mas dia durante siman of completamente.
Otro tema cu tambe a wordo trata ta e proceduranan di gobierno pa aumenta e eficiencia y mehora servicio y e rol di E-Government y e digitalisacion di e proceduranan aki.
RWZI tambe ta un tema cu tabata riba mesa y uno cu tin atencion di e asociacion. Ariba esaki e mandatario a informa cu manera ya caba ya conoci e ley pa privatisacion di RWZI ta na Parlamento. Cu e ley aki gobierno kier cuminsa soluciona e problema serio cu RWZI ta pa henter comunidad y naturalesa.
Por ultimo e topico di Hulanda y e negociacionnan financiero tambe a wordo toca durante e reunion. Segun prome minister Gobierno di Aruba ta keda na mesa cu Hulanda pa busca un solucion cu ta na beneficio di Aruba.
