Ayera mainta Aruba Trade & Industry Association (ATIA) a duna di conoce nan evento “LIDERA Purpose as Power” como un concepto nobo di conferencia pa asina trece na Aruba e concepto di ‘Proposito’.

Herrick Henriquez, director di ATIA, a splica cu e motibo dicon nan kier trece esaki dilanti e aña aki ta cu 2022 ta e aña di proposito di e organisacion mes, unda tur nan eventonan ta bay tin ‘proposito’ como tema pa e aña aki.

E organisacion ta convenci cu e actitud aki tin e capacidad di promove un recuperacion economico mas acelera pa e mercado di Aruba. Alabes Henriquez a duna di conoce cu a traves di nan movemento titula ‘LIDERA’, e empresario y comerciantenan di Aruba por distingui nan mes di otro isla y, na mesun momento, distingui nan mes na nivel nacional pa atrae e empleadonan ideal cu ta desea di tin den nan compania.

“Tur hende ta lidera nan bida, nan compania; nos kier promove esey den comunidad. Pa Aruba bira un comunidad yen di lider. Nos kier traha un movemento di esaki,” Henriquez a expresa.

E prome gran evento di e movemento lo ta e conferencia LIDERA, cu ta programa pa diasabra 27 di augustus proximo cu participacion di, entre otro, dos orador internacional di gran caliber. Pero mas cu esey ATIA ta considera cu e conferencia aki kier kibra e stereotipo di conferencia riba e isla, basa riba e pensamento cu ‘Business is Fun’, ta ofrece un evento atractivo y dinamico; un conferencia caminda e participante segun nan a sigura ta bay sali yen di energia, cu hopi idea, ademas di un mente habri y bista habri pa oportunidad.

“Esey ta LIDERA, esey ta e concepto pa trece un movemento nobo na Aruba.” Henriquez a menciona.

Tambe el a informa cu en e conferencia ta bay tin musica y contenido special dirigi door di profesionalnan pa profesionalnan cu ta moderno, upbeat y cu tin hopi motivacion.

E oradornan principal ta dos figura reconoci rond mundo y di nivel halto, esta Melis Senova y Trent Shelton.

Senova lo elabora riba e nocion di Human Centered Design, cu ta trata di e acercamento di personanan pa diseña su negoshi cu su empleadonan como elemento principal. E ta un lider reconoci den industria di liderazgo y diseño centralisa riba e ser humano como tal.

Su enfoke den coaching di liderazgo profundo ta un combinacion di neurociencia, diseño, liderazgo y pensamento sistemico, e tin un PhD den factornan humano specialisa den consenshi situacional den ambiente di stress halto, e ta asesor di hopi hende influyente, for di creadornan di cambio na comienso di su carera te hefenan di estado, for di 1999 e ta boga pa formanan di liderazgo den varios contexto diferente.

Di su parti, Shelton cu su videonan ta yega na mas di 60 miyon siguido rond mundo riba rednan social, unda ta bay trece un mensahe pa e publico di Aruba cu ta enfoca riba con e proposito ta tambe un poder. E tabata un hungado NFL anteriormente y aworaki ta e autor di “The Greatest You: Face Reality, Release Negativity, and live Your Purpose.

Igualmente, Shelton a funda e organisacion RehabTime cu e mision di sirbi na comunidad mundial, pa demostra cu cambio ta cuminsa for di paden a traves di desaroyo di nan fe, mentalidad, liderazgo, entre otro.

Como un parti adicional, e conferencia aki a invita algun di e nombernan mas conoci di sector empresarial di Aruba pa forma parti di un panel di orador y asina brinda nan punto di bista local cu ta sumamente importante. Henriquez a declara cu nan lo comparti e sabiduria cu a keda di e reto y exitonan cu nan a yega di biba aki na Aruba mes.

Igualmente, nan ta mira esaki como cu un inversion pa e lidernan di mañan y na mesun momento nan a duna un danki na tur partner den e conferencia di prensa.

Henriquez tambe a sigura cu ATIA ta organisa ademas di conferencia LIDERA tambe nan tin un evento gratis pa tur hoben cu ta atleta/studiante hunto cu Trent Shelton, unda e orador ta desea di conecta cu e hobennan Arubiano pa brinda nan motivacion.

Pa personanan interesa di asisti na e conferencia LIDERA, e ticketnan ta obtenibel a traves di e plataforma pay.aw di Setar, pa grupo of mesa denomina como Innovator Tickets, lo tin un Meet & Greet business Mixer pa duna inicio na e conferencia caminda lo tin oportunidad di conoce tur orador y panelista den un esfera mas personal.

Pa Innovator Tickets por yama oficina di ATIA na telefon 582-7593 of pasa personalmente na Pedro Gallegostraat 6 na Dakota. Tambe por contacta y keda na altura di tur informacion y detaye di e evento aki y mas, riba e paginanan di Facebook, Instagram y LinkedIn di ATIA.