Durante un conferencia di prensa diahuebs atardi, Asociacion Trabao di Hubentud na Aruba (ATHA) a lansa oficialmente e proyecto Poder di Hubentud pa aña 2021. Señora Vanessa Croes, coordinador di e proyecto Poder di Hubentud 2021 hunto cu señor Liandro Loopstok, miembro di comision, a splica e tema di e proyecto pa e aña aki, kico e proyecto encera y tambe rekisitonan necesario pa por nomina un hoben pa e proyecto.

Poder di Hubentud ta un proyecto cu a cuminsa na 2015 y e aña aki e proyecto ta celebrando su di 7 aña. Ayera 16 di september pa 8or di anochi e inscripcion a habri oficialmente pa aplica of nomina un hoben cu ta destaca den comunidad.

Sra. Croes ta splica cu e aña aki ta un aña unico pa e proyecto, ya cu e proyecto tin un tema. “Un tema cu ta ilustra cu cada hoben ta un faro ariba nan mes. Un faro cu ta ilumina y cu tin un luz briyante di paden, y cada un di nos como e adultonan cu ta compaña nos hobennan na Aruba tin e tarea primordial di habri e faro y permiti pa e luz aki briya y ilumina caminda di cada hoben na Aruba”.

Poder di Hubentud ta un proyecto cu desde su prome aña ta duna resultado hopi positivo na e formacion di lidernan hoben y hobennan adulto di Aruba. Sra. Croes ta menciona cu e enfoke di e proyecto Poder di Hubentud ta pa crea un generacion nobo di lider na Aruba cu lo tin e creatividad y tur e habilidadnan necesario pa lidera cu “innovacion, amor y pasion” den e mundo actual.

E proyecto Poder di Hubentud ta brinda e hobennan entre 15 y 21 aña di edad cu ta destaca den comunidad e oportunidad pa forma parti di e trayecto di formacion y desaroyo personal y profesional cu e proyecto ta ofrece. E trayecto ta consisti di participacion na tayernan cu enfoke ariba liderazgo y realisacion di e proyecto. E participantenan lo investiga e necesidadnan di e comunidad y lo realisa proyectonan cu entusiasmo y dinamismo segun ideanan innovativo.

Sr. Loopstok ta elabora ariba e criterionan necesario pa nomina un hoben pa e trayecto di Poder di Hubentud y e hoben aki mester destaca den e siguiente areanan: social, arte y cultura, educacion, deporte, trabao boluntario, innovacion y comunicacion, y desaroyo personal.

El a splica tambe e demas criterionan necesario pa nominacion di un hoben. Pa por nomina un hoben, e hoben mester ta uno cu a sobresali door di contribui boluntariamente na un of mas persona den comunidad, un hoben cu a haci un impacto of cambio positivo door di su propio esfuerso, den su propio situacion of di un otro persona of personanan y e mester ta un hoben cu tin disciplina, respet pa su mes y pa otronan.

Hobennan cu wordo nomina por participa den dos categoria. E categoria di hoben, entre 15 y 17 aña di edad, y e categoria di hoben adulto, entre 18 y 21 aña di edad. Poder pa Hubentud lo scoge 20 hoben entre tur esunnan cu wordo nomina pa continua cu e trayecto di e proyecto.

Sr. Loopstok ta splica cu e hobennan cu wordo nomina, cu ya caba ta lider riba nan mes, lo participa den trayecto cu tin como meta pa mehora nan liderazgo. “Nos ta duna nan e trayecto pa nan por sigui cana y haci nan stapnan mas fuerte den nos comunidad y asina yuda y traspasa nan conocemento na otro hobennan pa nan tambe por ta lider”, el a bisa.

E proyecto Poder pa Hubentud a cuminsa oficialmente ayera nochi cu e apertura di inscripcion y nominacion, lo tin diferente fecha unda cu lo tin tayernan di liderazgo y e proyecto lo culmina cu un anochi di premiacion, den luna di november, caminda den cada categoria lo tin premio pa e hoben y hoben adulto cu a destaca mas den su categoria como lider.

ATHA y Poder di Hubentud ta invita Aruba completo pa reconoce y nomina un hoben cu potencial di liderazgo y asina coopera y yuda e hobennan di Aruba pa sigui realisa proyectonan cu entusiasmo, a base di e necesidad cu Aruba tin, cu ideanan innovativo. Pa mas informacion di nominacion y inscripcion por tuma contacto cu oficina ATHA of bishita nan pagina di Facebook.