12 di Augustus ta dia internacional di hubentud y Asociacion Trabou di Hubentud na Aruba ta felicita tur hoben ariba nan dia. Ariba e dia aki nos ta celebra e ‘hoben’, nan logro, crecemento, erornan cu ta oportunidad pa tin desaroyo, nan curashi, nan dudanan cu ta pusha nan pa sali di nan comfort zone y descubri nan posibilidadnan.

E epoca di hubentud cu ta e edad di 13 pa 17 aña por ta añanan hopi dushi of cu hopi reto pa un hoben. E ta e oportunidad pa nos cu ta guia, educa y forma hobennan, y t’ey como e ehempel pa nan den e transicion pa bira adulto. Hobennan mester bira cada biaha mas consciente cu ser un adulto no ta bin cu e dushi di e material y libertad solamente, sino tambe e responsabilidad cu ta bin cu tur esaki. Mas cu tur, e hoben mester por tin e oportunidad pa vocifera nan mesun opinion cu respet, curashi, empatia y identidad propio.

E cantidad y nivel di abuso cu ta tuma lugar na Aruba ta alarmante. Hobennan ta pasa den dolor, hamber y desesperacion. Hobennan ta haya oportunidad y tentacion pa tuma mal caminda, y e hobennan por scoge pa haci actonan criminal. Pero ta bon pa alerta e adulto, mayor, educador of e guia—esaki no ta mas bien un refleho di nos mes—cu mester a dedica mas na e hoben den su etapa di formacion?

Ariba Dia Internacional di Hoben, Asociacion Trabou di Hubentud na Aruba ta pone enfasis ariba e realidad di e dicho ‘It takes a village to raise a child’. No ta gobierno y mayor solamente tin e responsabilidad di guia y forma un mucha of hoben. Cada un di nos tin e responsabilidad di ta e ehempel pa otro. Awe ta un bon dia pa haci e reflexion aki. Ciudadano, ban yuda otro, duna respet, practica empatia y cortesia y bo ta riba e bon direccion di ta un role model pa e hoben.

E pregunta cardinal no ta kende lo lidera Aruba mañan sino, con abo como ciudadano a aporta den un forma sano y positivo den e desaroyo di esun cu lo lidera nos Aruba mañan. Dia Internacional di Hoben ta un dia cu nos como adulto no por laga pasa sin celebra. Celebracion no mester nifica algo di material na prome lugar, tuma un momento y dedica na e hoben. Mayor, expresa amor y orguyo di su desaroyo con grandi of chikito cu e por ta. Dun’e un abraso y mustr’e cu bo ta orguyoso di dje y cu bo t’ey pe. Educador, guia, coach, expresa algo positivo di nan durante e dia aki. Hoben tin necesidad di scucha esaki mas y mas. Dunando balor na hobennan riba dia Internacional di Hoben, nos ta iniciando e cambio necesario pa un mihor Aruba.

Den cuadro cu e dia special aki, ATHA a celebra Dia Internacional di Hoben 6 dia largo cu ATHA U-TH Camp bou di coordinacion di Adelin Trimon-Geerman y Randy Trimon. Den e vakantiekamp ATHA a desaroya un programa di actividad enfocando ariba recreacion, educacion, cultura y aspecto social.

Hobennan a cuminsa na bishita Sta. Rosa pa educa nan con nan por yega na zakgeld na un moda sano. Cu e mesun proposito a educa nan con pa pisca unda a termina e dia cu un sunset bicycle tour.

E siguiente dia e hobennan a traha cupcakes y snacks pa ora bishita otro organisacionnan. Pa encurasha nan pa participa otro aña na actividad cultural di Aruba, e hobennan a siña traha y hisa fli. Anochi a termina e dia cu un Pool Party.

E tercer dia, despues di a haci actividad di team building y team work out ariba canoa e hobennan a bishita nos grandinan unda cu nan a parti cupcakes y snacks y duna atencion na nan. Di eynan a sigui cu bishita na Casa Cuna. E hobennan a haci stoelendans cu e muchanan. E enfoke di esaki ta pa e hobennan yega mas cerca di otro parti di comunidad unda nan por practica empatia y amor. A termina e dia ariba yate unda a wak dolfijn, a sambuya y a baila.

E di 4 dia a bishita Guarda nos Costa unda e hobennan a wordo inspira pa proteha nos Isla. Ivan Quandus a educa e hobennan tocante ‘Music Production’ merdia. Atardi hobennan a skirbi mensahe positivo y a pone esaki na autonan pa inspira y encurasha otro den un forma anonimo. A termina e dia na Papaya Ranch hungando Bolas Crioya.

E di 5 dia a celebra ariba The Palm Island. Anochi nan a traha kampvuur y a come marshmallows na veld di Sonrisa. E anochi aki a keda campa na Sonrisa.

Diasabra dia di Hoben nan a traha desayuno hunto y atende e charla cu tema “Guy cu Chick”. Jullie Thode a profundisa ariba relacion di amistad y amor entre hoben. Merdia a bishita Mary Joan Foundation unda cu e hobennan a conoce e organisacion y a skirbi un carta di sosten pa algun cliente. A termina e dia cu film na ATHA.