Recientemente Gobernador di Aruba Alfonso Boekhoudt a ricibi bishita na Cas Ceremonial di Gobernador di un grupo di studiante, presentando e prome carchinan di temporada cu Asociacion Trabou di Hubentud na Aruba (ATHA) tin pa ofrece na comunidad.

Gobernador a probecha di biaha y a haci su pedido cerca e studiantenan di Mon Plasir Basis, Colegio Arubano Ciclo Basico y Prinses Amalia School kendenan tur tabata tey di bishita cerca e gobernador. E muchanan cu a keda invita, ta di e grupo di ‘e miho bendedonan’ di aña pasa. Hunto cu e muchanan tabata tey director di ATHA Ricky Hoek.

Den un reaccion pa Bon Dia Aruba, sr. Hoek kende ta director di ATHA ta splica cu e carchinan presenta ta un tradicion di mas cu 30 anja. Antes tabata tin stampia pero un poco mas cu 10 aña pasa a cambia esaki den carchi. E proyecto aki ta esun di mas grandi cu ATHA ta presenta pa recauda fondo, cual na su turno ta wordo reparti bek den e miembronan di e asociacion. “Por ehempel si nos recauda 50 mil florin, nos ta parti esaki bek den nos miembronan pa asina yuda cu nan proyecto cu ta encera hobennan”, sr. Hoek ta splica Bon Dia Aruba. E ta sigui splica cu ATHA sa organisa mas evento durante di aña y e ta haci esaki segun cu por y si tin necesidad pe.

E aña aki ATHA a scoge e pintora Yahaira Maduro pa traha riba e diseño di e carchinan. Sra. Maduro ta splica na Bon Dia Aruba cu el a kies pa algo mas moderno y diferente, uzando bestianan local pero manteniendo e style cu e ta bon den dje esta portrait paintings. Sra. Maduro kende ta eherce trabou di hurista ta splica cu pintamento ta un di su hobbynan cu el a haci desde jong pero a pick up esaki algun aña atras como forma di distraccion pa su mes. E mes no a tuma  ningun curso of les di pintamento pero e ta kere cu e parti creativo e tine den su sanger den famia.Tumando na cuenta cu den su trabou diario e tin di haber cu hobennan, e no a duda den haci e proyecto aki cu ATHA no obstante e bida druk cu e tin como mama di dos mucha. Sra. Maduro a splica cu sin importa cu lo ta como carera of como hobby, el a traha tempo pa e proyecto aki, paso “mi ta pensa cu ta hopi importante pa mi duna mi aporte na nos muchanan.”

Sra. Maduro ta splica cu e ta kere cu mester sostene nos hobennan cu kier scoge un carera creativo. E ta splica cu hopi biaha hobennan ta wordo forsa pa tuma un estudio academico cu ta hopi biaha riba full un otro tereno di locual di berdad ta haci nan felis. “Na final si bo haci algo cu bo curason ta gusta, bo lo ta happy… Y nos tur kier ta happy!”, e ta termina bisando.

Por wak mas trabou artistico di sra. Maduro riba su pagina di Facebook: Art by Yahaira.