Un avion di Delta Airlines, fabrica pa Boeing, saliendo for di Aruba cu destino Atlanta, a haya su mes forsa pa bira back y haci un aterisahe di emergencia, despues cu un motor a rementa durante e despegue.

Piloto di e Boeing 737 900 a draai rond Aruba cuatro biaha prome cu bin back riba tera despues di e ‘problema mecanico’. Un vocero a bisa prensa internacional cu tabatin 168 pasahero abordo, ademas di cuatro assistent di vuelo y dos piloto. E pasaheronan mester a keda un anochi adicional na Aruba prome cu a sali ayera.

Un pasahero a describi e suceso riba e red social Reddit, bisando cu “un di e motornan a rementa memey di e despegue, nos a draai rond Aruba cuatro biaha y a aterisa di emergencia.” E pasahero a bisa cu Delta a paga pa hotel y cuminda pa e pasahero. Otro pasahero a bisa cu a scucha un zonido fuerte na comienso di e vuelo. “El a zona manera el a sucede net despues cu e ekipo di aterisahe a subi. Mi a kere na comienso cu un banda di e ekipo a keda pega y a subi laat.” E pasahero aki a bisa cu e capitan a usa e sistema di comunicacion pa bisa cu e motor links tabata na candela, pero cu tabata bao control. Despues di haci e chekeonan necesario, e piloto a tuma e decision pa bay back Aruba. “E pasaheronan tur tabata basta trankil cu e situacion. Nos a baha for di e avion y a bisa nos cu un parha grandi a bula den e motor.”

Problema na Boeing

Esaki ta apenas e mal noticia di mas recien pa Boeing, cu ta pasando den un aña duro.
Diamars, cabesante di Administracion Federal di Aviacion, FAA di Merca, a bisa cu Boeing mester mehora cultura di seguridad y atende problemanan di calidad prome cu e agencia lo permiti e fabricante di avion pa reforsa produccion di 737 MAX.

FAA fin di januari a tuma e stap sin precedente di bisa Boeing cu no lo permiti e compania expande produccion di 737 MAX den bista di un emergencia den aire di un jet di Alaska Airlines anteriormente dene luna.

Adminstrador di FAA, Mike Whitaker, a bisa Reuters den un entrevista diamars cu e agencia no a cuminsa discusion ainda cu Boeing tocante aumento di produccion di 737, y a bisa cu e agencia ta bay permiti un aumento solamente ora Boeing ta “dirigiendo un sistema di calidad di forma safe.”

Whitaker a bisa cu e tin herment pa tene Boeing “responsable y tin tur intencion pa usa nan.”

Boeing a nenga di duna comentario.

Departamento di Husticia Mericano a habri un investigacion criminal riba e explosion di un panel di cabina di un 737 MAX 9 den aire na januari.

Dia 28 di februari, Whitaker a bisa cu Boeing mester desaroya un plan comprensivo pa atende e ‘problemanan sistemico den calidad di control’ dentro di 90 dia y pone metanan.

“Esaki ta un accion a largo plaso – e ta dura hopi tempo pa cambia cultura,” Whitaker a bisa diamars.

Apart, Whitaker a papia durante weekend cu CEO di United Airlines, Scott Kirbi, tocante un serie di incidente recien di seguridad, incluyendo un avion cu a perde un panel diabierna ultimo. Kirby a bisa clientenan dialuna cu e aerolinea ta revisando incidentenan recien di seguridad y usando e hallazgonan pa actualisa training y procedura di seguridad pa empleadonan.