Un autobom di Taliban a explota riba forsanan di siguridad na un bario di Kabul diaranson matando 14 persona y heridando 145, mayoria di nan hende muhe, mucha y otro civilnan.
E bom a explota durante oranan di mainta, y ta un di atakenan mas grave na Kabul e aña aki. E ta aumenta miedo entre e poblacion pa loke por pasa ora cu e 20.000 militarnan di Merca y NATO bay nan pais.
E auto tabata yena cu explosivo na un luga di control di siguridad pafo di e sede di Polis segun Vocero di Polis, Firdaus Faramarz. Taliban a bisa cu nan obheto di atake tabata un centro di reclutacion di forsa di seguridad.
92 di e heridonan tabata civil, segun Vice-Ministro di Asunto Interior, Khoshal Sadat. Cuatro polis tabata entre esunnan cu a muri. E atake a sucede ora cu hopi di e residentenan di Kabul tabata prepara pa fiesta Musulman Eid al-Adha, cu ta cuminsa diadomingo. “Mi tabata come na un restaurant, ora cu explosion a sucede,” Mohmmad Qasem a bisa. Ora cu bentana a kibra, e hunto cu otronan a cuminsa core y hala leu.
Deliberacion di paz entre Merca y Taliban ta continua y Taliban ta bisa cu nan lo haci mas pa proteha civil. Sin embargo un cantidad creciente di persona ta muri den e atakenan di e grupo insurgente. Na juli a resulta e cantidad mas halto di victima civil desde 2017, cu mas di 1.500 persona morto of herida, segun informacion di Nacionnan Uni.
Cualkier atake Taliban ta un barera pa e proceso di paz, asina vocero presidencial, Sediq Seddiqi a bisa na periodista y a bisa cu forsanan di siguridad di Afghanistan ta fuerte y por proteha e poblacion di Afghanistan.
