ORANJESTAD – Nomber di Aruba ta resona positivamente den mundo cientifico relaciona cu un investigacion importante tocante e pisca invasivo Lion Fish realisa den nos lama.
E investigacion aki a wordo realisa pa Raven Walker, kende ta un studiante di Texas A&M University den estrecha colaboracion cu e biologo marino local, Byron Boekhoudt kende ta co-autor di e investigacion aki.
E ta un estudio di un gran embergadura cu a keda publica den Journal And Internacional. Mirando su importancia Walker lo haci un presentacion di dje otro luna. Sr. Boekhoudt como co-autor di e estudio aki ta bay participa den un conferencia pa e region Caribe pa e loke ta pesca den cuadro di e 69 conferencia di Gulf and Caribbean Fisheries Intitute.
E conferencia aki lo pone atencion riba aplicacion di e conocemento di e piscadonan y ciencia marino pa e soluciona e problemanan cu ta confronta e usuarionan di e recursonan di lama. Hunto nan lo bin cu decisionnan pa informa y coordina riba uzo sostenibel di e recursonan marino; y aplica nan conocemento riba e maneho di areanan protegi.
“Pa nos e ta hopi excitante cu un estudio haci na Aruba ta wordo presenta internacionalmente den un conferencia academico internacional”, sr. Boekhoudt a bisa.
E conferencia aki lo tuma luga na Grand Cayman, entre dia 7 te cu 11 di november. El a bisa cu Aruba ta bay ta den e plataforma internacional, ya cu e investigacion ta andando ainda pa loke ta Lion Fish
E estudio aki ta trece contesta riba con Aruba y su industria turistico y di pesca ta atendiendo cu e problematica di e pisca depredado aki. E estudio ta mustra cu nos pais ta pro activo, caminda Walker ta presenta Aruba como un modelo pa via di e industria di pesca pa controla e Lion Fish.
Sr. Boekhoudt a bisa cu un factor cu ta yuda hopi ta cu Aruba tin cantidad di restaurant cu ta ofrece e Lion Fish den nan menu.
