Cu tur e atencion pa e areglo legal cu Citgo y Valero for di mesa, ta di spera cu ta keda tempo pa maneha tratamento di varios otro asunto. Lo mester trata pronto naturalmente presupuesto 2017. Pero tambe un presupuesto complementario pa 2016, mirando e desaroyonan tanto den recaudacion di entrada di gobierno, como tambe e entradanan cu por haya ainda via e acuerdo cu Citgo y Valero. Como cu e deficit no por ta mas di 2% di GDP na final di aña, esey segun CAFT den su ultimo comentario lo haci un presupuesto adicional necesario. Como cu e presupuesto pa otro aña ta cla caba, tin mas capacidad pa traha riba esaki. Aki por mira con importante un presupuesto na tempo ta den mehoracion di e procesonan gubernamental. Esaki ta un asunto di beneficio general, no tin nada di haci cu politica.
Fuera di esey tin otro asunto cu talbes no ta tur hende ta mira como prioridad. Por ehemplo: nos ta den ultimo aña prome cu eleccion y keto bay Aruba ta e ultimo pais den Reino sin ley riba financiamento di partido politico. Algun tempo pasa e partido grandi den oposicion a menciona cu nan ta na fabor pa introduci tal ley. Despues a bira keto y di banda di e partido den gobierno di mes no ta tende nada, ya cu ta bisto cu esunnan cu mas ta probecha di financiamento comercial desconoci y incontrolabel. Lamentablemente nos ta mira un scenario ta pinta nos dilanti, cu pa di tantisimo biaha nos ta bay eleccion sin sikiera un intento pa termina e asunto aki. Y sigur pasobra accion mester bin di parti di gobierno y nan obviamente no ta interesa pa atende e asunto aki.
Mester trata tambe e ley pa introduci Ombudsman y Ombudsman pa mucha. Nos ta comprende cu financiamento pa e instituto ta inclui den presupuesto caba, asina ta tin obstaculo den esey. Den pasado nos a yega di duna comentario riba e propuesta di ley, cu na nos parecer ta implica un metemento innecesario di e mayoria (gubernamental) den parlamento den nombramento di ombudsman y su reemplasante. Y esaki consecuentemente no ta e miho garantia cu nos ta bay tin un ombudsman cu por actua independientemente, loke ta un condicion hopi importante, ya cu practicamente tur cos cu un ombudsman ta haci den cierto sentido ta implica critica riba gobierno o en todo caso un instancia oficial.
Nos por mira den e practica na nos hermana isla Curaçao cu e trabao di e ombudsman no ta cana sin problema y tin biaha ta termina hasta cu caso den corte. Diferente ta e asuntonan di e ombudsman Hulandes cu ta funciona na e islanan BES, cu ta haya hopi mas respet di e autoridadnan local, simplemente pasobra ta comprende miho cu e papel di e ombudsman no ta pa ataca gobernante y empleado publico personalmente, pero pa mustra riba cierto fayonan den e sistema di gobernacion y pa trece dilanti posibel cambio positivo cu lo ta na beneficio di e ciudadano.
Si nos mira e practica c tabatin na Aruba te awor cu leynan cu a keda introduci cu e mesun filosofia cu awor tin pa e ley di ombudsman, esey no ta duna mucho speransa. Den añanan anterior, riba insistencia Hulandes, a introduci e ley riba apelacion contra decision di instancia gubernamental (LAR), y e ley riba obligacion di gobierno pa duna documento na ciudadano (LOB). Loke por mira ta un practica unda instancianan gubernamental ta uza e legislacion deficiente pa arma trampa pa ciudadano, na luga di trata asunto cu cierto benevolencia y mente habri. Tambe hopi biaha no ta uza e experiencia di cierto caso pa mehora procedemento den gobernacion, pa yega na miho servicio y menos ‘red tape’ den gobernacion mes. Te awe ainda nos nunca a mira un evaluacion imparcial di funcionamento di e leynan aki. Despues di casi 20 aña di LAR y casi mes hopi di LOB lo ta interesante si por haci un evaluacion asina y uza e conclusionnan pa berdaderamente haci instrumento util di nan.
Pero nos tin miedo si cu esey no ta bay sucede y cu bayendo direccion eleccion na luga di mehora ta pio e mentalidad di e gobernantenan ta bira, salvo un excepcion positivo incidental. Loke nos por a mira recientemente den dos ocasion sigui, e ley di ‘all-inclusive’ y e ley riba Citgo/Valero, di actitud mal intencion y dirigi na no respeta constitucion pa loke ta derecho riba informacion di parlamento, no ta priminti nada bon.
Finalmente nos ta spera tambe cu lo bin cambio den e presupuesto di Husticia, pa incorpora e asuntonan urgente pa e ministerio aki por haci un miho trabao. Nos ta spera cu e ministro no perde curashi, pa e rabia cu esaki ta bay causa cerca su coleganan y cu e ta para firme pa haya e medionan financiero cu e ta kere cu e mester. Ta importante tambe cu e ta keda firme cu financiamento di su cartera no por depende di benevolencia di su colega di turismo.
