Den e articulonan di e simannan cu a pasa nos a papia di reduci costo di energia pa pueblo di Aruba. Si en berdad nos por reduci prijs di coriente dor di energia Solar, esaki por crea un ‘sinergia’ masivo cu e conceptonan mas nobo y sofistica den agricultura esta Container Farms.
Awo cu hermentnan manera Qredits su tarifa atractivo pa fiansanan agricultor y OStad Incubator, nos por empodera nos specialistanan local pa trece e generacion nobo di agricultura Aruba y asina yuda sigura cuminda di calidad halto y fresco pa pueblo.
Container Farming
E nomber ta bisa caba cu e concepto aki ta di un set up agricultor den un container. Pa un pais manera Aruba cu tin tiki espacio disponibel, e concepto aki ta uno hopi atractivo. Ademas e containernan aki ta di sofisticacion inmenso, cu luz special pa cada mata por crece den manera mas rapido, full climate control y sistemanan Hydroponic cu ta usa masha tiki awa y gordura. Tambe e sistemanan ta completamente automatisa cu dashboards di computer pa monitor tur cos 24/7. En fin cu sistemanan di AI vision por avisa di biaha of di antemano si algo por wordo mehora of si e productonan ta cla pa wordo colecciona.
E conceptonan aki ta usa den luga di awa, hopi mas coriente si y p’esey mi ta wak e bahamento di prijs di coriente como un rekisito pa por haci e concepto di container farming uno mas atractivo ainda. Na paisnan manera Alemania tin asina hopi energia solar, cu pa un par di ora pa dia e prijs di energia ta literalmente negativo. Dus si tin suficiente panel solar na Aruba por duna esnan usando Container Farms un tarifa reduci of te hasta coriente full gratis tanten e productonan produci ta bay pa pueblo di Aruba y no hotel di luho.
Awo e desbentaha di sistemanan avansa asina ta cu e prijs di bin cu container asina ta bastante halto, esta entre $80-$120.000,- US. Tambe un sistema asina ta rekeri hopi experticio di e agricultor. Hasta si e placa ta disponibel (cual e ta), mester train nos expertonan local den uso di e sistemanan avansa aki. E aspecto di training y experticio prome cu cuminsa cu conceptonan asina ta bastante importante. Locual ta financiamento por usa e prestamonan cu tarifa reduci di Qredits pa trece e prome test containernan Aruba. Manera cu berdura ta caro na nos isla, y cu un sistema asina ta produci berdura 24/7 y 365 dia pa aña, mi ta di opinion cu e concepto aki por beneficia pueblo y comerciante agricultor na e mesun momento.
Usando e concepto di Container Farming hunto cu tarifa reduci di coriente dor di panel Solar por yuda alivia e crisis di costo di bida na Aruba. Mi lo lag’e na e comerciantenan di agricultura pa haci nan bon investigacion over e topico aki y mi ta spera cu e por inspira y empodera esnan cu kier produci berdura pa nos dushi isla di Aruba
