Representantenan di tur parokia di nos pais, cu excepcion, manera semper di parokia di Oranjestad a bin hunto pa traha ariba e programa di celebracion di e prome lustro di fiesta di nos Patrona Mama Maria di Alto Vista.
E aña aki como ta e prome lustro, cada lustro esaki lo tuma luga, lo bay tin un procesion cu lo cuminsa for di pia di Sero di Alto Vista pa Kapel di Alto Vista. Tur parokianan lo bin cu nan Patrona/o pa duna e maximo homenahe na nos Mama Celestial, Mama Maria di Alto Vista, Reina di Santisimo di Rosario.
Manera ta e tradicion caba cu dia 28 lo cuminsa cu e nobena Nacional na honor di nos Patrona. Tur e dianan di nobena un parokia ta na turno y ta tuma luga na Kapel mes, cuminsando pa 5:30’or di atardi, mescos cu e gran celebracion.
Dia 28 september ta Parokia di Noord, nobena, sigui pa Santo Sacrificio di Misa canta, dia 29 september Parokia di Tanki Leendert, nobena, sigui pa Santo Sacrificio di Misa canta, dia 30 september Parokia di Dakota, nobena,sigui pa Santo Sacrificio di Misa, dia 1 di october Parokia di Paradera, nobena sigui pa Santo Sacrificio di Misa canta, dia 2 di october Parokia di Santa Cruz, nobena, sigui pa Santo Sacrificio di Misa, dia 3 di october Parokia di Savaneta, nobena, sigui pa Santo Sacrificio di Misa canta, dia 4 di october San Nicolas, nobena, sigui pa Santo Sacrificio di Misa canta, dia 5 di october Parokia di Brazil, sigui pa nobena y Santo Sacrificio di Misa, dia 6 di october Oranjestad(si nan participa), nobena, sigui pa Santo Sacrificio di Misa.
Dia 7 di October ta e gran dia, dia Nacional pa tur Catoliconan, fiesta di nos Patrona, Santisima Virgen Mama Maria di Alto Vista. Pa 5:30 lo cuminsa cu e procesion for di pia di Sero di Alto Vista. Tur Parokianan lo ser acompaña pa nan respectivo Patrona/o, muchanan cu a haci nan prome Santa Comunion, welp, verkenner, meisjes Gilde, gruponan di oracion, gruponan deportivo, scolnan di e Parokia concerni etc. Tambe tur paisnan cu tin grupo organisa, manera Filipinonan, Dominicanonan, Venezolanonan, Colombianonan, Peruanonan, Chinesnan, Haitianonan y otro paisnan ta keda cordialmente invita pa asisti na e procesion y e celebracion, acompaña cada un pa e Patrona/o di nan respectivo pais.
E lo bira sigur e movemento Catolico mas grandi pa e aña.
Na tur persona, Gobernantenan, comerciantenan, kendenan ya a duna nan cooperacion, masha hopi danki den nomber di Mama Maria di Alto Vista.
