Militantenan na Gaza a tira centenares di raket contra sur di Israel ayera, matando sikiera cuater Israeli y paralisa bida den e region, den e pelea mas sangriento desde un guera na 2014. Mientras Israel a bati Gaza cu atake aereo, e cantidad di morto Palestino a alcansa 23, incluyendo dos muhe na estado y dos baby.
E dramamento di sanger a marca e prome fatalidadnan Israeli a causa di raket desde e guera di 2014. Cu militantenan Palestino menasando di manda raket mas profundamente den Israel, y refuerso Israeli amasando cerca di frontera cu Gaza, e pelea no a mustra señal di baha velocidad.
Prome minister Israeli, Benjamin Netanyahu, a pasa mayor parti di e dia cera cu su gabinete di siguridad. Ayera, e gabinete a instrui milicia pa ‘continua su atake y keda alerta’ pa proximo orden. Israel tambe a bisa cu a asesina un comandante di Hamas, involucra den transferencia di fondonan Irani na e grupo.
Lider di Hamas, Ismail Haniyeh, a bisa den un declaracion ayera cu e grupo militante ‘no ta interesa den un guera nobo’. El a señala di ta cla pa ‘bolbe na estado di calma’ si Israel stop su atakenan, y ‘inmediatamente cuminsa implementa acuerdonan pa un bida digno’.
Cu tiki pa perde, Hamas ta parce di purba pone mas presion riba Netanyahu, na un momento cu e lider Israeli ta zwak den varios forma. Cu un victoria electoral recien, Netanyahu awo ta ocupa cu negociacionnan cu su socionan politico pa forma un gobierno di coalicion. Si e pelea continua, e normalmente cauteloso Netanyahu lo por ta mas debil den su negociacionnan mientras su aliadonan ta pusha pa un respuesta mas fuerte.
Despues e siman aki, Israel ta marca Memorial Day, un di e dianan mas solemne di aña, y su festivo Dia di Independencia. Proximo siman, Israel ta anfitrion di e concurso Eurovision. Pelea prolonga lo por pone un sombra riba e ocacionnan importante aki y desalenta turista stranhero.
E yegada di Ramadan no ta parce di desalenta Hamas. Na Washington, Secretario di Estado Mericano, Mike Pompeo, a bisa cu e Israelinan ‘tin tur derecho pa defende nan mes’, expresando speransa cu por restaura e cese al fuego.
Oficialnan Israeli a bisa cu 66 persona a ser herida durante e disturbio, tres di nan di seriedad. E fatalidadnan Israeli tabata e prome relaciona cu raket desde e guera di 2014, den cual 73 persona, incluyendo seis civil, a perde nan bida di banda Israeli.
Ehercito Israeli a bisa cu a tira 250 blanco na Gaza, incluyendo un almacenamento di arma, tunnelnan di atake, y facilidadnan pa produccion y lansamento di raket. Ademas a manda tanki y infanteria pa e frontera cu Gaza.
Oficialnan medico Palestino a reporta 23 morto, incluyendo sikiera 8 militante den atake aereo.
