(AP) – Den e lunanan desde cu President Joe Biden a adverti Rusia su Vladimir Putin cu e mester a cuminsa combati e gangnan di ‘ransomware’ den su pais, no tabatin un atake mesun grandi cu esun den fin di mei cu a resulta den escasez di gasolin. Pero esaki ta tiki pa Ken Trzaska.
Trzaska ta president di Lewis & Clark Community College, un scol chikito na Illinois cu a cancela su lesnan pa dianan largo despues di un secuestro di dato, conoci como ‘ransomware’ cu a laga e sistemanan critico di computer offline.
“E prome dia,” Trzaska a bisa, “mi ta kere nos tur tabatin mas di 20 ora lanta, purando di move bay dilanti cu e proceso y purba di lidia cu loke a pasa.”
Aunke Merca actualmente no ta lidiendo cu atakenan di ‘ransomware’ grandi manera esun cu a tuma luga anteriormente e aña aki, unda cu e victimanan tabata e suminstro di carni global, of a mantene miyones di Mericano di yena nan tanki di gasolin, e problema no a disparce. En realidad, e atake na Trzaska su scol tabata parti di varios episodio chikito cu a cay riba e negoshinan, gobierno, scolnan y hospitalnan cu tabata victima.
E scol su situacion ta refleha e desafionan cu e administracion Biden ta enfrenta den e combate contra e menasa, y su progreso haciendo esaki desde cu ‘ransomware’ a bira un problema di siguridad nacional.
Oficialnan di Merca a recaptura algun pago pa libertad di e informacion, a combati e abuso di cryptocurrency, cual ta e monedanan online, y a haci algun aresto. Agencianan di spionahe a lansa atakenan contra gruponan di ‘ransomware’ y Merca a pidi gobiernonan federal, di estado y local, conhuntamente cu industrianan priva pa aumenta nan proteccionnan.
6 luna despues di Biden su coneshonan na Putin, e ta dificil pa por saca afo si e hackernan a stop pa causa di e presion di Merca. E atakenan chikito ta sigui tuma luga, cu criminalnan di ‘ransomware’ operando for di Rusia cu loke ta aparenta inmunidad. Oficialnan di administracion a duna reportahenan cu tabata un poco contradictorio tocante Rusia su comportamento y si esaki a cambia. Ademas, complicando e situacion mas ainda, ta cu ‘ransomware’ no ta na prome luga den e agenda di Merca y Rusia, cu Washington enfoca riba prevencion di Putin su invacion na Ukraine.
E Cas Blanco a bisa den un declaracion cu nan ta determina pa “combati tur ransomware” pa medio di su hermentnan amplio, pero añadiendo cu e gobierno su respuesta ta depende riba e nivel di e atake, y con severo esaki ta.
“Tin loke ta asunto pa cuerpo policial y otronan di impacto halto, y actividad di ‘ransomware’ cual ta nifica un menasa directo na e siguridad nacional cu ta rekeri di otro medidanan,” e declaracion a continua.
Atakenan di ‘ransomware’ den cual hackernan ta lock e datonan di e victima, y ta demanda sumanan halto pa debolbe esaki, a bira un emergencia di siguridad nacional pa e administracion despues cu un atake den mei na Colonial Pipleine, cual ta provee casi mita di e gasolin consumi na East Coast.
E atake a causa cu e compania mester a para e operacionnan, cual a trece un escasez di gasolin pa varios dia, aunke esaki a sigui cu su servicio despues di a paga mas di 4 miyon dollar cu e hackernan a demanda. Despues di esaki, a bin un atake riba procesador di carni JBS, ken a paga 11 miyon dollar.
Biden a reuni cu Putin den juni na Geneva, unda cu el a sugeri cu secotrnan critica di infrastructura mester ta “fuera di limite” pa atakenan di ‘ransomware’ y a bisa cu Merca mester sa entre 6 luna pa un aña “si nan tin un acuerdo di siguridad cibernetico cu lo cuminsa trece ordo.”
