Pagina di internet di varios organismo publico na Venezuela a ser ataca dialuna mainta, pa un grupo di pirata informatico cu a identifica nan mes como ‘The Binary Guardians’. Nan a pone riba pagina un mensahe di apoyo pa e toma arma cu a tuma lugar na Fuerte Paramacay, diadomingo pasa na Valencia – Venezuela.
“Nos lucha ta digital, abo mester cera e caminda publico y nos ta detene e red,” tabata e mensahe cu a keda publica riba homepage di varios organismo publico, manera Conseho Nacional Electoral, Tribunal Supremo di Husticia, Asamblea Nacional, entre otro. “Awe nos mester di bo, soldad. Nos ta lucha pa derechonan di tur Venezolano via rednan social, y e pueblo balente mester bay riba caya y asina mustra nan apoyo pa e soldad balente.” “E dictadura tin su tempo conta,” e pirata informatico a agrega.
E grupo a sigura cu nan a tumba mas di binti pagina di organismo oficial di gobierno di Venezuela, nan a drenta den webpage di Cantv, empresa di telecomunicacion di gobierno, como tambe pagina di CONATEL, organismo cu ta regula tur comunicacion, pagina di presidencia di republica di Venezuela y pagina di Servicio di identificacion y estranheria. Dialuna mas laat tur pagina tabata traha normal atrobe.
