ORANJESTAD – Ultimo siman di januari, Aruba tabata presente na e evento mas grandi den e industria turistico y hotelero pa nos region, cu a tuma luga na Montego Bay, Jamaica. E evento di Caribbean Hotel & Tourism Association ta duna proveedornan di turismo e oportunidad pa cera conoci, reuni, of negosha sea cu socionan existente of nobo.
Ehecutivonan di A.T.A. hunto cu AHATA y nos hotelnan/socionan local ta enfoca primordialmente riba reuni cu tour operadornan existente y nobo, durante di e evento aki. Den e cuadro aki, esnan cu ta bende Aruba na Merca y Canada ta presente y asina ta permiti e delegacion pa ricibi un update completo di benta y demanda pa Aruba. Ademas esaki ta duna oportunidad pa negosha cualkier aspecto cu ta rekeri esaki. Tambe ta papia entre otro di e ultimo tendencianan y con turismo di Aruba ta compara cu otro destinacionnan den Caribe, pa 2019 den e caso aki.
Mirando e resultadonan pa 2017 y 2018 pa cu e mercado Norte Americano, unda esaki a mustra un crecemento di 10.7% na 2017 y te cu october 2018 un crecemento di 7.1%. E entrada pa medio di turismo pa e dos añanan aki cu tabata uno fuerte, pusha pa gran parti cu demanda di e region aki. Metanan pa 2019 ta mas modera y ta enfoca riba consolida entrada pa medio di turismo. Pa loke ta trata cantidad di bishitante meta pa 2019, ta pa Merca crece esaki cu 4%. Pa Canada ta pa crece cu 1%. Pa loke ta trata entrada pa camber (RevPAR), e meta ta pa consolida esaki den 2019 compara cu 2018, unda esaki a crece cu 10.3%, despues di a crece cu 10.8% na 2017. E diferente aspectonan aki entre otro mester conduci na crecemento di entrada pa medio di turismo, esta e ‘Tourism Credits’ registra pa Banco Central, na 2019 compara cu 2018.
Manera ya indica 2019 mester ta un aña unda ta tene cuenta cu entre otro hotelnan cu ta sigui bin bek y haci nan re-entrada despues di tabata cera pa construccion e dañonan causa door di horcannan na 2017. Esaki a bin ta e caso y ta continuando. Fuera di esaki e expansion di productonan hotelero nobo na entre otro Republica Dominicana, Jamaica y Mexico ta continua grandemente. Esaki ta componentenan cu ta haci e competencia hopi mas fuerte.
A base di reunionnan sosteni por deduci cu, manera ya anticipa, e prome mita di 2019 ta sigui mustra positivo cu algun señalacion cu mester pusha maart (unda por) ainda. Pa loke ta e segundo mita di 2019, esaki ta canando bon por lo general, no solamente riba nivel di demanda, pero tambe pa loke ta e prijsnan cu esunnan bishitando ta pagando pa nan experiencia na Aruba. Nos destinacion ta sigui posiciona su mes como un producto eleva, cu un prijs eleva. Mas cu claro si e demanda no t’ey, esaki ta wordo ahusta debidamente. Pero ‘por lo general’ aspectonan di demanda y e stabilidad/crecemento di entrada ta canando den bon direccion. Mester sigui pusha e di dos mita di 2019 y pa esaki a papia di tur e plannan cu ya tin delinea y cu ta ser activa.
Ta bon pa menciona cu despues di e CHTA, e delegacion di Aruba, consistiendo di A.T.A. y AHATA, a reuni cu ehecutivonan di Barcelo, Holiday Inn y Hilton separadamente na Miami, Florida. A pasa riba e resultadonan di 2018 y di biaha a bay over pa expectativa, proyeccion y strategianan pa Aruba pa 2019-2020. Esaki ta parti di esfuerso pa reuni cu oficinanan principal di e diferente cadenanan hotelero na Aruba, y asina alinea. Lo sigui reuni cu demas di e hotelnan na Aruba den e simannan cu ta sigui.
